ന്യൂഡല്‍ഹി: മകള്‍ പീഡനത്തിനിരയായത് വീട്ടുകാര്‍ അറിഞ്ഞത് സോഷ്യല്‍മീഡിയയില്‍ വീഡിയോ വൈറലായപ്പോള്‍. പടിഞ്ഞാറന്‍ ഡല്‍ഹിയിലാണ് 12 വയസുള്ള പെണ്‍കുട്ടിയെ അയല്‍വാസി പീഡിപ്പിച്ചത്.. മാനസിക വൈകല്യമുള്ള കുട്ടിയെ പീഡിപ്പിക്കുന്നതിന്റെ വാട്‌സ്ആപ്പ് വീഡിയോ കണ്ടതിന്റെ ഞെട്ടലിലാണ് കുട്ടിയുടെ കുടുംബം. സംഭവത്തില്‍ 3 പേരെ ഡല്‍ഹി പൊലീസ് അറസ്റ്റ് ചെയ്തു.

പെണ്‍കുട്ടിയുടെ അയല്‍വാസിയായ ബണ്ടിയും സുഹൃത്തുക്കളുമാണ് അറസ്റ്റിലായിരിക്കുന്നത്. പെണ്‍കുട്ടിയെ ഒരു കമ്മ്യൂണിറ്റി സെന്ററിലേക്ക് ബണ്ടി തട്ടിക്കൊണ്ടുപോകുകയായിരുന്നു. തുടര്‍ന്ന് ആളൊഴിഞ്ഞ സ്ഥലത്ത് വെച്ച് കുട്ടിയെ പീഡനത്തിനിരയാക്കി. കുട്ടിയെ പീഡിപ്പിക്കുന്ന ദൃശ്യങ്ങള്‍ സുഹൃത്തുക്കള്‍ വീഡിയോ എടുത്തു. ഈ വീഡിയോയില്‍ നിന്നാണ് പീഡനം നടന്ന സ്ഥലം പൊലീസ് മനസിലാക്കിയത്.

പോസ്‌കോ നിയമപ്രകാരമാണ് ബണ്ടിക്കെതിരെ കേസെടുത്തിരിക്കുന്നത്. ഐപിഎസി, ഐടി നിയമപ്രകാരമാണ് സുഹൃത്തുക്കള്‍ക്കെതിരെ കേസെടുത്തത്. കേസ് പിന്‍വലിക്കണമെന്ന് ആവശ്യപ്പെട്ട് ബണ്ടിയുടെ വീട്ടുകാര്‍ തങ്ങള്‍ക്ക് മേല്‍ സമ്മര്‍ദ്ദം ചെലുത്തുകയാണെന്ന് പെണ്‍കുട്ടിയുടെ കുടുംബം ആരോപിച്ചു.”നാട്ടില്‍ വലിയ സ്വാധീനമുള്ളവരാണ് ബണ്ടിയും കുടുംബവും. കേസ് പിന്‍വലിക്കണമെന്ന് ആവശ്യപ്പെട്ട് അവര്‍ ഞങ്ങള്‍ക്ക് മേല്‍ സമ്മര്‍ദ്ദം ചെലുത്തുകയാണ്. ഈ നാട് തന്നെ വിട്ടുപോകണമെന്നാണ് അവര്‍ ഞങ്ങളെ ഭീഷണിപ്പെടുത്തുന്നത്”, പെണ്‍കുട്ടിയുടെ അമ്മ പറഞ്ഞു.