കണ്ണൂര്‍, കരുണ മെഡിക്കല്‍ കോളജുകളിലെ വിദ്യാര്‍ത്ഥി പ്രവേശനം സാധൂകരിക്കാന്‍ നിയമസഭയില്‍ ഒന്നിച്ച സര്‍ക്കാറിനും പ്രതിപക്ഷത്തിനും സുപ്രീംകോടതി വിധി കനത്ത തിരിച്ചടിയായി. സ്വാശ്രയ മെഡിക്കല്‍ പ്രവേശനവുമായി ബന്ധപ്പെട്ട ക്രമക്കേടുകള്‍ ജെയിംസ് കമ്മിറ്റി മുതല്‍ അക്കമിട്ട് നിരത്തിയിട്ടും ഇത്രയും കാലം നടത്തിയ സമരപ്രതിഷേധങ്ങളെയും പേരുകളെയും വിസ്മരിച്ച്‌ ഇരുകൂട്ടരും ഈ വിഷയത്തില്‍ ഒരുമിച്ചത് അമ്പരപ്പോടെയാണ് കേരള ജനത നോക്കിക്കണ്ടത്. എന്നാല്‍ വിദ്യാര്‍ത്ഥികളുടെ ഭാവി മാത്രമാണ് തങ്ങളുടെ ലക്‌ഷ്യം എന്ന് പറഞ്ഞ് ഓര്‍ഡിന്‍സിന് പകരമുള്ള ബില്‍ ഐകകണ്ഠ്യേന സഭ പാസാക്കി. ജെയിംസ് കമ്മിറ്റി തീരുമാനവും കോടതികളുടെ വിധിയും എതിരായതോടെയാണ് കുട്ടികളുടെ ഭാവി ഉയര്‍ത്തി വിഷയം വീണ്ടും രാഷ്ട്രീയനേതൃത്വങ്ങള്‍ പരിഗണനക്കെടുത്തത്. എന്നാല്‍ സര്‍ക്കാരിന്റെയും പ്രതിപക്ഷത്തിന്റെയും ഒത്തുകളിയിലൂടെ വഴിയാധാരമാകുന്നത് വിദ്യാര്‍ത്ഥികളാണ്.
സ്വാശ്രയ വിഷയത്തില്‍ ഇത്രയും നാള്‍ പ്രതിപക്ഷം കളിച്ചത് പൊറാട്ട് നാടകമായിരുന്നുവെന്ന് സംശയമില്ലാതെ പുറത്താകുന്ന കാഴ്ചയാണ് കഴിഞ്ഞ ദിവസം നിയമസഭയില്‍ കണ്ടത്. കോണ്‍ഗ്രസ് എംഎല്‍എമാര്‍ നിയമസഭയില്‍ സ്വാശ്രയ വിഷയത്തില്‍ നടത്തിയ സമരം അവരുടെ നേതാക്കള്‍ പോലും മറന്ന മട്ടാണ്. വിദ്യാര്‍ത്ഥികള്‍ക്കു വേണ്ടിയാണെന്ന് പറഞ്ഞുകൊണ്ട് പ്രതിപക്ഷവും ഭരണ പക്ഷവും ഒരുപോലെ ഒരുമിച്ചിരിക്കുകയാണ് സ്വാശ്രയ വിഷയത്തില്‍.
ഈ ബില്ലിനെതിരെ പ്രതിപക്ഷത്തു നിന്നും വിടി ബല്‍റാം മാത്രമാണ് എതിര്‍പ്പ് ഉയര്‍ത്തിയത്. എന്നാല്‍ ഈ വിഷയത്തില്‍ ബല്‍റാമിനെ തള്ളാന്‍ മുന്നില്‍ നിന്നത് സ്വന്തം നേതാവ് തന്നെയാണ്. ബില്‍ സ്വകാര്യമേഖലയെ സഹായിക്കാനാണെന്ന് വിടി ബല്‍റാം ആരോപിച്ചിരുന്നു. എന്നാല്‍ മാനേജ്മെന്റുകളെ സഹായിക്കാനല്ല ബില്ല് കൊണ്ടുവന്നതെന്നും വിദ്യാര്‍ത്ഥികളുടെ ഭാവി മുന്നില്‍ കണ്ടാണെന്നും സഭയില്‍ ചെന്നിത്തല വ്യക്തമാക്കി. സര്‍ക്കാരും പ്രതിപക്ഷവും ചേര്‍ന്നുള്ള ഒത്തുകളിയല്ല ഇതെന്നും അദ്ദേഹം കൂട്ടിച്ചേര്‍ത്തു.
കണ്ണൂര്‍ മെഡിക്കല്‍ കോളെജ് 118 സീറ്റ്, കരുണ മെഡിക്കല്‍ കോളെജ് 31 സീറ്റ് വീതമാണ് പ്രവേശനം ക്രമപ്പെടുത്തിയിരിക്കുന്നത്. മെഡിക്കല്‍ കോളേജ് പ്രവേശനവുമായി ബന്ധപ്പെട്ട് സംസ്ഥാന സര്‍ക്കാര്‍ ഓര്‍ഡിനന്‍സ് പുറത്തിറക്കിയതിനെ സുപ്രീം കോടതി നേരത്തെ വിമര്‍ശിച്ചിരുന്നു. കണ്ണൂര്‍, കരുണ മെഡിക്കല്‍ കോളേജുകളില്‍ മാനേജ്മെന്റുകള്‍ നേരിട്ട് പ്രവേശിപ്പിച്ച വിദ്യാര്‍ത്ഥികളെ സംരക്ഷിക്കാനാണ് സര്‍ക്കാര്‍ ഓര്‍ഡിനന്‍സ് ഇറക്കിയത്. എന്നാല്‍ കഴിഞ്ഞവര്‍ഷം സര്‍ക്കാരുമായി കരാര്‍ ഒപ്പിടാതെ കണ്ണൂര്‍, കരുണ മെഡിക്കല്‍ കോളേജുകള്‍ നേരിട്ട് നടത്തിയ പ്രവേശനം മേല്‍നോട്ട സമിതി റദ്ദാക്കിയിരുന്നു. അതിനെ തുടര്‍ന്ന് വിദ്യാര്‍ത്ഥികളുടെ പഠനം പ്രതിസന്ധിയില്‍ ആയി. കണ്ണൂരില്‍ 150ഉം കരുണയില്‍ 30ഉം വിദ്യാര്‍ത്ഥികളുടെ പ്രവേശനമാണ് റദ്ദായത്. ഈ നടപടി സുപ്രീംകോടതിയും ശരിവച്ചു. കരുണയില്‍ 30 വിദ്യാര്‍ത്ഥികളെ പ്രവേശനപരീക്ഷാ കമ്മിഷണര്‍ പകരം അലോട്ട് ചെയ്തെങ്കിലും അവര്‍ക്ക് ഇക്കൊല്ലം പ്രവേശനം നല്കാനായിരുന്നു കോടതി നിര്‍ദ്ദേശം.
അംഗീകാരം ഇല്ലെന്നിരിക്കെയും ഇരുകോളേജുകളിലും മാനേജ്മെന്റ് പ്രവേശിപ്പിച്ച വിദ്യാര്‍ത്ഥികള്‍ പഠനം തുടര്‍ന്നിരുന്നു. ഒന്നാം വര്‍ഷ പരീക്ഷയ്ക്കായി ആരോഗ്യ സര്‍വകലാശാലയെ സമീപിച്ചപ്പോഴാണ് പ്രവേശനത്തിന് അംഗീകാരമില്ലാത്തതിനാല്‍ രജിസ്റ്റര്‍ ചെയ്തിട്ടു പോലും ഇല്ലെന്ന് വിദ്യാര്‍ത്ഥികള്‍ തിരിച്ചറിഞ്ഞത്. വന്‍ ഫീസ് വാങ്ങി കുട്ടികളെ പ്രവേശിപ്പിച്ച മാനേജ്മെന്റുകളാകട്ടെ കൈമലര്‍ത്തി. കുട്ടികള്‍ കോടതിയെ സമീപിച്ചെങ്കിലും അപേക്ഷ തള്ളി. ഇതോടെയാണ് കുട്ടികള്‍ സര്‍ക്കാരിനെ സമീപിച്ചത്. ഇതിനെത്തുടര്‍ന്ന് ഈ കോളേജുകളിലെ കുട്ടികളുടെ പ്രവേശനം സംബന്ധിച്ച്‌ സര്‍ക്കാര്‍ ഓര്‍ഡിനന്‍സ് ഇറക്കുകയായിരുന്നു. നീറ്റ് റാങ്ക് ലിസ്റ്റിലുണ്ടായിരുന്ന ഈ വിദ്യാർത്ഥികൾ ഒരു വർഷം പഠനം പൂർത്തിയാക്കിയെന്നും കുട്ടികളുടെ ദുരിതം പരിഹരിക്കുന്നതിനാണ് നിയമ നിർമാണം നടത്തുന്നതെന്നുമായിരുന്നു സർക്കാരിന്‍റെ വാദം.
സര്‍ക്കാര്‍ ഒാര്‍ഡിനന്‍സിനെതിരെ കോടതിയുടെ രൂക്ഷ വിമര്‍ശനം നിലവില്‍ക്കെയാണ് നിയമനിര്‍മാണത്തിന് സര്‍ക്കാര്‍ മുന്നിട്ടിറങ്ങിയത്. വിദ്യാര്‍ത്ഥികളെ മാനദണ്ഡം പാലിക്കാതെ പ്രവേശിപ്പിച്ചതിനെതിരായ ഹര്‍ജി വ്യാഴാഴ്ച സുപ്രീംകോടതി പരിഗണിക്കാനിരിക്കെയാണ് പുതിയ നിയമനിര്‍മ്മാണം നടത്തിയതെന്നത് ശ്രദ്ധേയമാണ്. എന്നാല്‍ സര്ക്കാരിന്റെ വാദങ്ങളെല്ലാം കോടതി തള്ളുകയും ചെയ്തു. കണ്ണൂർ, കരുണ മെഡിക്കൽ കോളജ് പ്രവേശനവുമായി ബന്ധപ്പെട്ട് സുപ്രീം കോടതിയിൽനിന്നും കനത്ത പ്രഹരം ഏറ്റുവാങ്ങിയെങ്കിലും ഓർഡിനൻസുമായി സർ‌ക്കാർ മുന്നോട്ട് പോകുകയാണ്. നിയമവകുപ്പിന് കൈമാറിയ ബിൽ ഗവർണർക്ക് അയച്ചു. ഓർഡിനൻസ് സുപ്രീംകോടതി റദ്ദാക്കിയതിനു പിന്നാലെയാണ് ബിൽ ഗവർണർക്ക് അയച്ചിരിക്കുന്നത്. ഓര്‍ഡിനന്‍സിലൂടെ കണ്ണൂർ, കരുണ മെഡിക്കൽ കോളജുകളിലേക്ക് വിദ്യാര്‍ത്ഥി പ്രവേശനം നടത്താനാണ് സംസ്ഥാന സര്ക്കാരിന്റെ നീക്കം. മെഡിക്കല്‍ കൗണ്‍സില്‍ ഓഫ് ഇന്ത്യ മുന്നോട്ടു വച്ച ചട്ടങ്ങള്‍ ലംഘിച്ച് കണ്ണൂര്‍, കരുണ മെഡിക്കല്‍ കോളജുകള്‍ പ്രവേശനം നടത്തിയ നടപടി നേരത്തെ സുപ്രീം കോടതി തടഞ്ഞിരുന്നു. സുപ്രീം കോടതിയുടെ ഈ വിധി മറികടക്കാനാണ് സര്‍ക്കാര്‍ ഓര്‍ഡിനന്‍സ് കൊണ്ടുവന്നത്. ഓര്‍ഡിനന്‍സിലൂടെ ഈ രണ്ടു കോളജുകളിലേക്ക് വിദ്യാര്‍ഥി പ്രവേശനം നടത്താനായിരുന്നു സംസ്ഥാന സര്ക്കാരിന്റെ നീക്കം. എന്നാല്‍ നിയമവിരുദ്ധ പ്രവര്‍ത്തനം നടത്തിയ സ്വകാര്യ സ്വാശ്രയ മാനേജ്മെന്റുകളെ രക്ഷിക്കാന്‍ സര്‍ക്കാറുമായി പ്രതിപക്ഷവും ഒത്തുകളിച്ചെന്ന ആക്ഷേപം ശക്തമാകുകയാണ്. അതിനു പുറമെ അവരില്‍ നിന്ന് സാമ്പത്തികനേട്ടം ഉണ്ടാക്കിയെന്ന ഗുരുതരമായ ആരോപണവും പ്രതിപക്ഷത്തിന് നേരെ ഉയരുന്നുണ്ട്.
Post Your Comments