തൃശൂര്‍: കാക്കിയിട്ടാല്‍ ട്രാഫിക് നിയമങ്ങള്‍ ലംഘിക്കാനുള്ള അധികാരമാണെന്ന് പൊലീസ് ഉദ്യോഗസ്ഥര്‍ കരുതരുതെന്ന് മുഖ്യമന്ത്രി പിണറായി വിജയന്‍. തൃശൂര്‍ പൊലീസ് അക്കാദമിയില്‍ പരിശീലനം പൂര്‍ത്തിയാക്കിയ 381 പൊലീസ് ഡ്രൈവര്‍മാരുടെ സല്യൂട്ട് സ്വീകരിച്ചു സംസാരിക്കുകയായിരുന്നു അദ്ദേഹം. പൊലീസുകാരുടെ ഭാഗത്ത് നിന്നുണ്ടാകുന്ന ചെറിയ തെറ്റ് പോലും പൊലീസ് സേനയുടെ തെറ്റായി കാണുമെന്നും അതു സേനയ്ക്ക് ഒന്നാകെ നാണക്കേടുണ്ടാക്കുമെന്നും അദ്ദേഹം പറഞ്ഞു.
ഈ നിലപാടിന് മാറ്റം വേണമെന്നും, പൊലീസ് സേനയുടെ യശസ് ഉയര്‍ത്തുന്ന തരത്തിലായിരിക്കണം ഓരോരുത്തരും പ്രവൃത്തിക്കേണ്ടതെന്നും മുഖ്യമന്ത്രി വ്യക്തമാക്കി. ഡ്രൈവര്‍മാരുടെ കുറവുമൂലം ഈ ജോലികള്‍ പോലീസുകാര്‍ ചെയ്യേണ്ട അവസ്ഥയായിരുന്നു. അതിനു മാറ്റം വരുത്തുകയെന്ന ലക്ഷ്യത്തോടെയാണ് 1,160 പുതിയ തസ്തിക അനുവദിച്ചത്. അതിന്റെ ഭാഗമായി 400 പേരെയാണ് ഇപ്പോള്‍ നിയമിച്ചിരിക്കുന്നത്. കൂടാതെ ആധുനിക രീതിയില്‍ പ്രവര്‍ത്തിക്കുന്ന പ്രമുഖ വാഹന കമ്പനികളില്‍ എത്തി തൊഴില്‍ശാലകള്‍ സന്ദര്‍ശിച്ച്‌ പരിശീലനം ലഭ്യമാക്കന്‍ സാധിച്ചതു നേട്ടമാണ് ,അദ്ദേഹം കൂട്ടിച്ചേര്‍ത്തു.
വരുണ്‍, വജ്ര, ഹെവി റിക്കവറി വാന്‍, ക്രെയിന്‍ എന്നിവയില്‍ അടക്കം ഉന്നത പരീശിലനവും ഉന്നത വിദ്യാഭ്യാസവും ഉള്ളവരാണ് പുതിയതായി പുറത്തിറങ്ങുന്നവരെന്നും മുഖ്യമന്ത്രി ചൂണ്ടിക്കാട്ടി. ബെസ്റ്റ് ഷൂട്ടറായി തെരഞ്ഞെടുക്കപ്പെട്ട കെ.യുഅനിഷ്, ബെസ്റ്റ് ഓള്‍റൗണ്ടര്‍ കെ.ഹരി, ബെസ്റ്റ് ഒൗട്ട് ഡോര്‍ പി.സുരാജ്, ഇന്‍ഡോറായി കെ.ജിനിഷ് എന്നിവര്‍ക്കു മുഖ്യമന്ത്രി അവര്‍ഡുകള്‍ നല്‍കി. ഡിജിപി ലോക്നാഥ് ബെഹ്റ, എഡിജിപി ബി.സന്ധ്യ, മേയര്‍ അജിത ജയരാജന്‍, ജില്ലാ പഞ്ചായത്ത് പ്രസിഡന്‍റ് മേരി തോമസ് തുടങ്ങിയവര്‍ പങ്കെടുത്തു.
Post Your Comments