പെൺകുട്ടിയെ ക്രിമിനൽ പ്രതി സ്വയം തീകൊളുത്തി കെട്ടിപ്പിടിച്ചു : സി സി ടി വി ദൃശ്യങ്ങൾ

യുവാവ് സ്വയം തീകൊളുത്തിയ ശേഷം പെൺകുട്ടിയെ കെട്ടിപ്പിടിച്ച് പൊള്ളലേൽപ്പിച്ച് കൊലപ്പെടുത്താൻ ശ്രമിച്ചു. മദ്ധ്യപ്രദേശിലെ ചിന്ദ്വാരയിലാണ് വ്യത്യസ്ത രീതിയിലുള്ള കൊലപാതകശ്രമം അരങ്ങേറിയത്. ചിന്ദ്വാരയിലെ ഒരു ഹോട്ടലിലാണ് ഞെട്ടിക്കുന്ന സംഭവമുണ്ടായത്. ചിന്ദ്വാര സ്വദേശിയായ നവനീത് എന്ന യുവാവാണ് സ്വയം തീകൊളുത്തിയ ശേഷം പെൺകുട്ടിയെ കെട്ടിപ്പിടിച്ച് പൊള്ളലേൽപ്പിച്ച് കൊലപ്പെടുത്താൻ ശ്രമിച്ചത്.

സംഭവത്തിൽ നവനീതിനും പെൺകുട്ടിക്കും ഗുരുതരമായി പരിക്കേറ്റു. ഇയാൾ മറ്റൊരു കൊലപാതക ശ്രമക്കേസിലെ പ്രതിയാണ്. ഇയാൾക്കെതിരെ പെൺകുട്ടി സാക്ഷി പറഞ്ഞതിനാണ് ഇയാൾ പെൺകുട്ടിയെ പൊള്ളലേൽപ്പിച്ചു കൊലപ്പെടുത്താൻ ശ്രമിച്ചത്. ഇയാൾ പെൺകുട്ടിയെ കെട്ടിപ്പിടിച്ച് കൊലപ്പെടുത്താൻ ശ്രമിച്ചതിന്റെ സിസിടിവി ദൃശ്യങ്ങൾ കഴിഞ്ഞദിവസം പുറത്തുവന്നിരുന്നു.

ചിന്ദ്വാരയിലെ ഒരു ഹോട്ടലിൽ തന്റെ പിറന്നാൾ ആഘോഷിക്കാനെത്തിയ സമയത്തായിരുന്നു പെൺകുട്ടി ആക്രമണത്തിനിരയായത്. ഹോട്ടലിന് പുറത്തുവച്ച് സ്വയം തീകൊളുത്തിയ നവനീത് അകത്തേക്ക് ഓടിക്കയറിയ ശേഷം പെണ്‍കുട്ടിയെ കെട്ടിപ്പിടിക്കുകയായിരുന്നു. ഹോട്ടലിലുണ്ടായിരുന്ന മറ്റുള്ളവർ ഓടിയെത്തി ഇരുവരെയും രക്ഷപ്പെടുത്തി. തീ അണച്ച ശേഷം ഗുരുതരമായി പരിക്കേറ്റ രണ്ടുപേരെയും ആശുപത്രിയിൽ പ്രവേശിപ്പിച്ചു.