ദക്ഷിണാഫ്രിക്കയ്ക്ക് എതിരായ മൂന്നാം ഏകദിനത്തിലും ഇന്ത്യന്‍ ഹിറ്റ്മാന് രോഹിത് ശര്‍മ്മ പരാജയമായിരുന്നു. ആറ് പന്തില്‍ ഒരു റണ്‍ പോലും നേടാനാകാതെയാണ് രോഹിത് പവലിയനില്‍ മടങ്ങി എത്തിയത്. ടെസ്റ്റ് പരമ്പരയിലും ഏകദിന പരമ്പരയിലുമായി ഒറ്റ അര്‍ധ സെഞ്ചുറി പോലും രോഹിത്തിന്റെ പേരിലില്ല. ആദ്യ രണ്ട് മത്സരങ്ങളിലും 20, 15 എന്നിങ്ങനെയായിരുന്നു രോഹിത്തിന്റെ പ്രകടനം.
ആറ് പന്ത് നേരിട്ട് റബാഡയുടെ പന്തില്‍ വിക്കറ്റ് കീപ്പര്‍ ക്ലസന് ക്യാച്ച് നല്‍കിയാണ് രോഹിത് മടങ്ങിയത്. ഇതോടെ ഏതെങ്കിലുമൊരു രാജ്യത്ത് ഇന്ത്യന്‍ താരത്തിന്റെ കുറഞ്ഞ ശരാശരി എന്ന നാണക്കേട് രോഹിതിന്റെ പേരിലായി. ഏകദിനത്തില്‍ മൂന്ന് ഡബിള്‍ സെഞ്ചുറി നേടിയിട്ടുള്ള രോഹിത്തിന്റെ ദക്ഷിണാഫ്രിക്കയിലെ ശരാശരി വെറും 12.10 മാത്രമാണ്.
ഇന്ത്യയില്‍ 15.66 ശരാശരിയുള്ള അജിത് അഗാക്കറെയാണ് നിലവിലെ ഇന്ത്യന്‍ ഓപ്പണര്‍ മറികടന്നത്. 16.81 ശരാശരിയുമായി മുഹമ്മദ് കൈഫാണ് ദക്ഷിണാഫ്രിക്കയില്‍ കുറഞ്ഞ ശരാശരിയുള്ള മറ്റൊരു ഇന്ത്യന്‍ താരം. പട്ടികയിലെ ആദ്യ അഞ്ച് സ്ഥാനങ്ങളിലുള്ള ഏക മുന്‍നിര ബാറ്റ്സ്മാനും രോഹിതാണ്.
Post Your Comments