സെഞ്ചൂറിയനില്‍ സെഞ്ചുറിയുമായി കോഹ്ലി; ഇന്ത്യ ലീഡിനായി പൊരുതുന്നു

സെഞ്ചൂറിയന്‍: വിമര്‍ശകര്‍ക്കുള്ള മറുപടിയായി ദക്ഷിണാഫ്രിക്കയ്ക്ക് എതിരെയുള്ള രണ്ടാം ടെസ്റ്റില്‍ കോഹ്ലിയുടെ സെഞ്ചുറി. 183ന് അഞ്ച് വിക്കറ്റ് എന്ന നിലയില്‍ മൂന്നാം ദിനം ബാറ്റിംഗ് ആരംഭിച്ച ഇന്ത്യ ലീഡിനായി പൊരുതുകയാണ്. ഇന്ത്യന്‍ നായകന്‍ വിരാട് കോഹ്ലിയുടെ സെഞ്ചുറിയാണ് ഇന്ത്യയെ തകര്‍ച്ചയില്‍ നിന്നും രക്ഷിച്ചത്. 146 പന്തില്‍ നിന്നായിരുന്നു കോഹ്ലി 100 തികച്ചത്. കോഹ്ലിയുടെ 21-ാം ടെസ്റ്റ് സെഞ്ചുറിയാണിത്.

മൂന്നാം ദിനം 15 റണ്‍സ് നേടിയ ഹര്‍ദിക് പാണ്ഡ്യയുടെയും 38 റണ്‍സ് നേടിയ ആശ്വിന്റെയും വിക്കറ്റുകളാണ് ഇന്ത്യയ്ക്ക് നഷ്ടമായത്. നിലവില്‍ 135 റണ്‍സുമായി കോഹ്ലിയും റണ്‍സ് ഒന്നും നേടാതെ മുഹമ്മദ് ഷമിയുമാണ് ക്രീസിലുള്ളത്.

ടോസ് നേടി ബാറ്റിംഗ് തിരഞ്ഞെടുത്ത ദക്ഷിണാഫ്രിക്കയുടെ ആദ്യ ഇന്നിംഗ്‌സ് 335 റണ്‍സിന് അവസാനിച്ചിരുന്നു ഇന്ത്യയ്ക്കായി അശ്വിന്‍ നാല് വിക്കറ്റുകള്‍ നേടിയപ്പോള്‍ ഇഷാന്ത് ശര്‍മ്മ മൂന്നും മുഹമ്മദ് ഷമി ഒരു വിക്കറ്റും നേടി.

മറുപടി ബാറ്റിംഗിന് ഇറങ്ങിയ ഇന്ത്യയുടെ മുന്‍ നിര തകര്‍ന്നടിയുകയായിരുന്നു. വിജയ് 46 റണ്‍സ് നേടി. രാഹുലും രോഹിത് ശര്‍മ്മയും 10 റണ്‍സിന് പുറത്തായി. പൂജാര അക്കൗണ്ട് തുറക്കുന്നതിന് മുമ്പ് പുറത്തായപ്പോള്‍ പാര്‍ഥീപ് പട്ടേല്‍ 19 റണ്‍സിന് പുറത്തായി.