തിരുവനന്തപുരം•കാറ്റും കടൽക്ഷോഭവും ഉണ്ടാകുമെന്നുള്ള മുന്നറിയിപ്പ് സംസ്ഥാന സർക്കാരിന് നവംബർ 28 ന് തന്നെ നൽകിയെന്നതിന് തെളിവ് ബി.ജെ.പി സംസ്ഥാന അദ്ധ്യക്ഷൻ കുമ്മനം രാജശേഖരൻ പുറത്തുവിട്ടു . കുമ്മനം കേന്ദ്ര സമുദ്ര സ്ഥിതി പ്രവചന വിഭാഗം ഡയറക്ടർ സതീഷ് ഷേണായിക്കയച്ച കത്തിനു ലഭിച്ച മറുപടിയിലാണ് ഇക്കാര്യം വ്യക്തമാക്കുന്നത്.
മുന്നറിയിപ്പ് 30 നാണ് ലഭിച്ചതെന്ന് സംസ്ഥാന സർക്കാർ വ്യക്തമാക്കുന്ന സാഹചര്യത്തിലാണ് കുമ്മനം ഡയറക്ടർക്ക് കത്തെഴുതിയത് . എന്നാൽ കടൽ ക്ഷോഭം ഉണ്ടാകുമെന്നും 45 മുതൽ 55 കിലോമീറ്റർ വേഗതയിൽ കാറ്റടിക്കാൻ സാദ്ധ്യതയുണ്ടെന്നും നവംബർ 28 ന് തന്നെ കേരളത്തെ അറിയിച്ചെന്നാണ് സതീഷ് ഷേണായിയുടെ മറുപടി . കേരളത്തിനയച്ച സന്ദേശവും മറുപടിയോടൊപ്പം ചേര്‍ത്തിട്ടുണ്ട്. .
നവംബർ 29 ന് രാവിലെ 8:30 മുതൽ നവംബർ 30 ന് രാത്രി 11:30 വരെ സമുദ്രത്തിൽ 8 അടി മുതൽ 10 അടി വരെ ഉയരത്തിൽ തിരമാലകളുണ്ടാകുമെന്നും മുന്നറിയിപ്പിൽ ഉണ്ട് . നവംബർ 29 ന് ഉച്ചയ്ക്ക് ചുഴലിക്കാറ്റിന്റെ മുന്നറിയിപ്പ് നൽകിയതായും ഷേണായി മറുപടിയിൽ വ്യക്തമാക്കുന്നു.
ചുഴലിക്കാറ്റിലും കടൽക്ഷോഭത്തിലും പെട്ട് ഉഴലുന്ന തീരദേശത്ത് വേണ്ട രീതിയിൽ മുന്നറിയിപ്പ് നൽകാനോ സംസ്ഥാന സർക്കാരിന് കഴിഞ്ഞില്ല എന്ന ആരോപണം ഉയരുന്നതിനിടെയാണ് തെളിവ് പുറത്തുവന്നിരിക്കുന്നത്.
Post Your Comments