തുടർതോൽവികൾ നേരിട്ട ശ്രീലങ്കൻ ക്രിക്കറ്റ് ടീമിനെതിരെ അഴിമതി വിരുദ്ധ വിഭാഗം അന്വേഷണത്തിന്

കൊളംബോ: രാജ്യാന്തര ക്രിക്കറ്റിൽ തുടർതോൽവികൾ നേരിട്ട ശ്രീലങ്കൻ ക്രിക്കറ്റ് ടീമിനെതിരെ ഐസിസി അഴിമതി വിരുദ്ധ വിഭാഗം അന്വേഷണം നടത്തുമെന്ന് റിപ്പോർട്ട്. റാങ്കിങ്ങിൽ ഏറെ പിന്നിലുള്ള സിംബാബ്‍വെയ്ക്കെതിരെ ലങ്കയുടെ ഏകദിന മൽസരങ്ങളിലെ തോൽവികൾ അന്വേഷിക്കാനാണ് സാധ്യത.

ഇന്ത്യയ്ക്കെതിരെ ടെസ്റ്റ്, ഏകദിന, ട്വന്റി20 മൽസരങ്ങളിൽ സമ്പൂർണ തോൽവി വഴങ്ങിയ ലങ്കൻ ടീം അതിനു മുൻപ് സിംബാബ്‍വെയ്ക്കെതിരെ ഏകദിന പരമ്പരയിൽ 2–3ന് തോറ്റിരുന്നു. അതേസമയം 2011ൽ ലോകകപ്പ് ഫൈനലിലെ ഇന്ത്യയ്ക്കെതിരായ ശ്രീലങ്കയുടെ തോൽവിയെക്കുറിച്ചും അന്വേഷിക്കണമെന്ന് അർജുന രണതുംഗ ആവശ്യം ഉന്നയിച്ചിരുന്നു.