ചാരപ്പണി : എം.പിയുടെ പി.എയെക്കുറിച്ച് പുറത്തുവരുന്ന വിവരങ്ങള്‍ അമ്പരപ്പിക്കുന്നത്

ന്യൂഡൽഹി : സമാജ് വാദി പാർട്ടി എം പി ചൗധരി മുനവർ സലീമിന്റെ പി എ ഫർഹത് ഖാൻ ചാര പ്രവർത്തനം നടത്തുകയായിരുന്നെന്ന് പോലീസ്. 20 വർഷമായി ഫർഹത് ഖാൻ ചാര പ്രവർത്തനം നടത്തുകയായിരുന്നുവെന്നാണ് റിപ്പോർട്ട്. ഐ എസ് ഐയ്ക്ക് പാർലമെന്റുമായി ബന്ധപ്പെട്ട രേഖകൾ കൈമാറുന്ന പ്രവർത്തനമായിരുന്നു ഖാൻ ചെയ്തുകൊണ്ടിരുന്നതെന്നും പോലീസ് പറഞ്ഞു. ഇയാൾ പാക് ഹൈക്കമ്മീഷനുമായി ബന്ധപ്പെട്ട് പ്രവർത്തിച്ചു വന്ന ചാരശൃംഖലയിലെ പ്രധാന കണ്ണിയായിരുന്നു.

ചാരശൃംഖലയിലെ ബാക്കിയുളള ആൾക്കാരെപ്പറ്റിയും ഏതൊക്കെ രേഖകളാണ് ഇയാൾ കൈമാറിയിട്ടുളളതെന്നും അന്വേഷണം നടക്കുകയാണ് . രേഖകളുടെ പ്രാധാന്യത്തിനനുസരിച്ച് 10,000 മുതൽ ഒരു ലക്ഷം വരെ ഖാൻ വാങ്ങിയിട്ടുണ്ടെന്നാണ് പോലീസ് കണ്ടെത്തിയത്. കൂടാതെ ഇയാൾ ഇന്ത്യ തിരിച്ചയച്ച പാക് ഹൈക്കമ്മീഷൻ ഉദ്യോഗസ്ഥൻ മെഹമൂദ് അക്തറുമായി ഫോണിലും നേരിട്ടും ബന്ധപ്പെട്ടിട്ടുണ്ട് . അക്തറിനു മുൻപുണ്ടായിരുന്ന ഉദ്യോഗസ്ഥരുമായും ഇയാൾക്ക് ബന്ധമുണ്ടായിരുന്നു.