ബസ് ചാര്‍ജ് വര്‍ധന പ്രാബല്യത്തില്‍, അറിയാം പുതിയ നിരക്കുകള്‍

തിരുവവന്തപുരം: ബസ് ചാര്‍ജ് വര്‍ധന നിലവില്‍ വന്നു. ഓര്‍ഡിനറി ബസുകളുടെ മിനിമം നിരക്ക് വ്യാഴാഴ്ച മുതല്‍ ഏഴ് രൂപയില്‍ നിന്നും ഒരു രൂപ കൂടി എട്ട് രൂപയായി. ഫാസ്റ്റ് പാസഞ്ചറുകളുടേത് 10ല്‍ നിന്നും 11 ആയി. കിലോമീറ്റര്‍ നിരക്ക് 64 പൈസയില്‍ നിന്നും 70 ആയി വര്‍ധിച്ചു.

വര്‍ധനയുടെ 25 ശതമാനം മാത്രം സ്റ്റേജിന് ഈടാക്കാനാണ് സര്‍ക്കാര്‍ ഉത്തരവിലുള്ളത്. ഇതുപ്രകാരം ഒരു രൂപ വര്‍ധിപ്പിക്കുമ്പോള്‍ 25 പൈസമാത്രമേ രണ്ടാംസ്റ്റേജില്‍ ഈടാക്കാനാവൂ. എന്നാല്‍, 50 പൈസയ്ക്ക് താഴെയുള്ള വര്‍ധന കണക്കിലെടുക്കാന്‍ പാടില്ല. പഴയനിരക്കുതന്നെ തുടരും.

also read: ബസ് ചാര്‍ജ് ഇനി മിനിമം എട്ട് രൂപ, വിദ്യാര്‍ത്ഥികളുടെ നിരക്കിലും ആനുപാതിക വര്‍ധന

പത്തുരൂപ നിരക്കുള്ള മൂന്നാം സ്റ്റേജില്‍ രണ്ടു രൂപയാണ് വിദ്യാര്‍ത്ഥികളുടെ നിരക്ക്. ഇതില്‍ വര്‍ധനയില്ല. 12, 13 രൂപ ഈടാക്കുന്ന നാല് അഞ്ച് സ്റ്റേജുകളില്‍ രണ്ട് രൂപയാണ് ഈടാക്കിയിരുന്നത്. അത് മൂന്നു രൂപയായി ഉയര്‍ത്തി. വിദ്യാര്‍ഥികളെ സംബന്ധിച്ചിടത്തോളം ആദ്യത്തെ മൂന്ന് സ്റ്റേജുകളാണ് പ്രധാനപ്പെട്ടത്. ഇതില്‍ കാര്യമായ വര്‍ധനവില്ലാത്തത് വിദ്യാര്‍ത്ഥികള്‍ക്ക് പ്രയോജനപ്പെടും. രണ്ടാം സ്റ്റേജിലെ ഒരുരൂപ കുറവും ഗുണകരമാകും.

ആദ്യത്തെ സ്റ്റേജിന് ഒരു രൂപയും ശേഷിക്കുന്ന രണ്ട് സ്റ്റേജുകള്‍ക്ക് 50 പൈസ വീതം വര്‍ധിക്കുന്നതുമായിരുന്നു നിലവിലെ കണ്‍സെഷന്‍ നിരക്ക് ക്രമം. പുതിയ നിരക്കു പ്രകാരം ദീര്‍ഘദൂരം യാത്രചെയ്യുന്ന വിദ്യാര്‍ത്ഥികള്‍ക്ക് മാത്രമാണ് കാര്യമായ വര്‍ധന. കോളേജ് വിദ്യാര്‍ത്ഥികളെയാകും ഇത് ബാധിക്കുക. 22 രൂപയുടെ പത്താം സ്റ്റേജില്‍ 3.50 രൂപയായിരുന്ന നിരക്ക് 7 ആയി ഉയര്‍ന്നിട്ടുണ്ട്.