ലങ്കയെ തകർത്തെറിഞ്ഞ് കോഹ്‌ലിപ്പട; ഇന്നിങ്‌സ് ജയത്തോടെ ടീം ഇന്ത്യ

നാഗ്പുർ: ശ്രീലങ്കയ്‌ക്കെതിരായ രണ്ടാം ക്രിക്കറ്റ് ടെസ്റ്റില്‍ ഇന്ത്യക്ക് തകര്‍പ്പന്‍ ജയം. ശ്രീലങ്കയ്ക്കെതിരായ രണ്ടാം ക്രിക്കറ്റ് ടെസ്റ്റിൽ ഇന്നിങ്സിനും 239 റൺസിനുമാണ് ഇന്ത്യ ജയിച്ചത്. ടെസ്റ്റിൽ ഏറ്റവും വേഗത്തിൽ 300 വിക്കറ്റ് നേട്ടം കൈവരിച്ച രവിചന്ദ്രൻ അശ്വിന്റെ മികവിലാണ് ഇന്ത്യയുടെ പടയോട്ടം. ആദ്യ ഇന്നിങ്‌സില്‍ ഇന്ത്യ പടുത്തുയര്‍ത്തിയ 610 എന്ന കൂറ്റന്‍ സ്‌കോര്‍ മറികടക്കാന്‍ രണ്ട് ഇന്നിങ്‌സ് ബാറ്റ് ചെയ്തിട്ടും ലങ്കയ്ക്കായില്ല. ആദ്യ ഇന്നിങ്‌സില്‍ 205 ഉം രണ്ടാം ഇന്നിങ്‌സില്‍ 166 റണ്‍സെടുത്ത് ശ്രീലങ്കന്‍ ബാറ്റ്‌സ്മാന്‍മാര്‍ കീഴടങ്ങുകയായിരുന്നു.

ആദ്യ ഇന്നിങ്‌സില്‍ നാല് വിക്കറ്റ് സ്വന്തമാക്കിയ ആര്‍.അശ്വിന്‍ രണ്ടാം ഇന്നിങ്‌സിലും വിക്കറ്റ് വേട്ട ആവര്‍ത്തിച്ചു. 54–ാം ടെസ്റ്റിൽ 300 വിക്കറ്റ് നേട്ടം പിന്നിട്ട അശ്വിൻ 56-ാം ടെസ്റ്റിൽ റെക്കോർഡ് കണ്ടെത്തിയ ഓസീസ് താരം ഡെന്നിസ് ലിലിയുടെ റെക്കോർഡാണ് തകർത്തത്. 66–ാം ടെസ്റ്റിൽ ഈ നേട്ടത്തിലെത്തിയ അനിൽ കുംബ്ലെയുടെ ഇന്ത്യൻ റെക്കോർഡും അശ്വിൻ മറികടന്നു.