സൈനയെ ട്രോളിയ ആരാധകന് കിട്ടിയത് വമ്പന്‍ പണി. റിയോ ഒളിംപിക്‌സില്‍ വനിതകളുടെ ബാഡ്മിന്റന്‍ സിംഗിള്‍സ് വിഭാഗത്തില്‍ ഇന്ത്യയ്ക്ക് വേണ്ടി വെള്ളി നേടിയ പി.വി.സിന്ധുവിന്റെ പേരിലാണ് സൈന നെഹ്‌വാളിനെ ആരാധകന് ട്രോളാന്‍ ചെന്നത്.
ആരാധകന് നടത്തിയ പരാമര്‍ശമിങ്ങനെ: ”പ്രിയ സൈന… താങ്കളുടെ പെട്ടിയും മടക്കാന്‍ ഒരുങ്ങിക്കൊള്ളുക. മികച്ചവരെ വീഴ്ത്താനറിയാവുന്ന ഒരു താരത്തെ ഞങ്ങള്‍ക്കു ലഭിച്ചു കഴിഞ്ഞു”. പ്രകോപനപരമായ ഈ ട്രോളിന് സൈന മറുപടി നല്‍കിയത് ഇങ്ങനെയാണ് ; ”ഉറപ്പായും. വാക്കുകള്‍ക്ക് നന്ദി. സിന്ധു വളരെ നല്ല പ്രകടനമാണ് കാഴ്ചവയ്ക്കുന്നത്. ഇന്ത്യയും ഏറെ മുന്നേറിയിരിക്കുന്നു”. തന്റെ ട്രോളിന് സൈന പ്രകോപിതയാകുമെന്നായിരുന്നു ആരാധകന്റെ ധാരണ. സൈനയുടെ മറുപടിയോടെ താന്‍ നടത്തിയ അപക്വമായ ട്രോളിന് ആരാധകന് മാപ്പ് പറഞ്ഞു. മാത്രമല്ല, സൈനയുടെ ആരാധകനാണ് താനെന്നും അദ്ദേഹം വ്യക്തമാക്കി. ആരാധകന്റെ മാപ്പപേക്ഷയോട് സൈനയുടെ പ്രതികരണം ഇങ്ങനെയായിരുന്നു, ”ഒരു പ്രശ്‌നവുമില്ല പ്രിയ സുഹൃത്തേ. താങ്കള്‍ക്ക് എല്ലാവിധ ആശംസകളും”.
രാജ്യം ഏറെ പ്രതീക്ഷ അര്‍പ്പിച്ചിരുന്ന സൈന ആദ്യ റൗണ്ടില്‍ തോറ്റു പുറത്താവുകയും സൈനയുടെ നിഴലായി റിയോയിലെത്തിയ പി.വി.സിന്ധു ഫൈനലില്‍ ഇടം പിടിക്കുകയും ചെയ്ത പശ്ചാത്തലത്തിലായിരുന്നു ആരാധകന്റെ ട്രോള്‍. ഈ ട്രോളിന് സൈന നല്‍കിയ ശാന്തസുന്ദരമായ മറുപടിയാണ് ട്രോളിയ ആരാധകനേയും ഒപ്പം ആയിരക്കണക്കിന് ട്വിറ്റര്‍ ഫോളോവേഴ്‌സിനെയും വീഴ്ത്തിക്കളഞ്ഞത്.
Post Your Comments