മലപ്പുറം : കോട്ടക്കലിൽ ഓടിക്കൊണ്ടിരുന്ന കണ്ടെയ്നർ ലോറിക്ക് തീപിടിച്ചു. കോട്ടക്കൽ നഗരത്തിൽ കഴിഞ്ഞ ദിവസം രാത്രി പതിനൊന്നരയോടെയാണ് അപകടം. മലപ്പുറം ഭാഗത്തുനിന്ന് കോഴിക്കോട് ഭാഗത്തേക്ക് തെർമോക്കോളുമായി പോകുന്ന കണ്ടെയ്നർ ലോറിക്കാണ് തീപിടിച്ചത്.
ആര്യവൈദ്യശാല ജോലി കഴിഞ്ഞ് ഓട്ടോറിക്ഷയിൽ ഇന്ധനം നിറക്കാൻ പോകുകയായിരുന്ന പണിക്കർക്കുണ്ട് സ്വദേശി മൊയ്തീനാണ് ലോറിയിൽനിന്ന് പുക ഉയരുന്നത് കണ്ടത്. തുടർന്ന് ഏറെദൂരം സഞ്ചരിച്ച് വാഹനം തടയുകയായിരുന്നു. ഇതോടെ റോഡിന് മധ്യേ ലോറി നിർത്തിയിട്ടു. പിന്നാലെ തീ ആളിപ്പടരുകയായിരുന്നു. ഡ്രൈവറടക്കം രണ്ടുപേരാണ് വാഹനത്തിൽ ഉണ്ടായിരുന്നത്.
സാധനസാമഗ്രികളടക്കം ലോറിയുടെ ഉൾവശം പൂർണമായി അഗ്നിക്കിരയായി. അര മണിക്കൂറോളം നിന്നു കത്തിയ ലോറി മലപ്പുറത്തു നിന്നും തിരൂരിൽ നിന്നും എത്തിയ മൂന്ന് യൂണിറ്റ് അഗ്നിശമന സേന സംഘം ചേർന്നാണ് തീ അണച്ചത്.
കോട്ടക്കൽ എസ്.എച്ച്.ഒ എം.കെ. ഷാജി, വേങ്ങര എസ്.എച്ച്.ഒ മുഹമ്മദ് ഹനീഫ, മലപ്പുറം, തിരൂർ അഗ്നിശമന സേന ഉദ്യോഗസ്ഥരായ കെ. പ്രതീഷ്, ജയരാജ് എന്നിവരുടെ നേതൃത്വത്തിലായിരുന്നു രക്ഷാനടപടികൾ. അതേസമയം, തീപിടിക്കാനുണ്ടായ കാരണം വ്യക്തമല്ല.
Post Your Comments