ശ്രീരാമൻ ജനിച്ച സ്ഥലത്ത് രാമക്ഷേത്രം വേണമെന്ന് വിശ്വാസികൾ 500 വർഷമായി ആഗ്രഹിക്കുന്നതാണ്’: അമിത് ഷാ

ന്യൂഡൽഹി: 2019-ൽ നിലവിൽ വന്ന പൗരത്വ (ഭേദഗതി) നിയമം (സിഎഎ) ഈ വർഷം ലോക്‌സഭാ തിരഞ്ഞെടുപ്പിന് മുമ്പ് ഇത് സംബന്ധിച്ച ചട്ടങ്ങൾ പുറപ്പെടുവിച്ചതിന് ശേഷം നടപ്പാക്കുമെന്ന് കേന്ദ്ര ആഭ്യന്തര മന്ത്രി അമിത് ഷാ. പ്രതിപക്ഷം അടക്കമുള്ളവർ നമ്മുടെ സി.എ.എയുടെ പേരും പറഞ്ഞ് മുസ്ലീം സഹോദരങ്ങളെ തെറ്റിദ്ധരിപ്പിക്കുകയാണെന്ന് അമിത് ഷാ പറഞ്ഞു.

പാകിസ്ഥാൻ, അഫ്ഗാനിസ്ഥാൻ, ബംഗ്ലാദേശ് എന്നിവിടങ്ങളിൽ പീഡനത്തിന് ശേഷം ഇന്ത്യയിലെത്തിയവർക്ക് പൗരത്വം നൽകാൻ മാത്രമാണ് സി.എ.എ കൊണ്ട് ഉദ്ദേശിക്കുന്നതെന്നും ഇത് ആരുടെയും ഇന്ത്യൻ പൗരത്വം തട്ടിയെടുക്കാനുള്ളതല്ലെന്നും അദ്ദേഹം പറഞ്ഞു. ET NOW ഗ്ലോബൽ ബിസിനസ് സമ്മിറ്റ് 2024 ൽ സംസാരിക്കുകയായിരുന്നു അമിത് ഷാ.

വരുന്ന തെരഞ്ഞെടുപ്പിൽ ബിജെപിക്ക് 370 സീറ്റുകളും എൻഡിഎ 400ൽ അധികം സീറ്റുകളും നേടുമെന്നും പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ തുടർച്ചയായി മൂന്നാം തവണയും സർക്കാർ രൂപീകരിക്കുമെന്നും കേന്ദ്രമന്ത്രി പറഞ്ഞു. ലോക്‌സഭാ തെരഞ്ഞെടുപ്പിൻ്റെ ഫലത്തിൽ യാതൊരു സംശയവുമില്ലെന്നും കോൺഗ്രസും മറ്റ് പ്രതിപക്ഷ പാർട്ടികളും വീണ്ടും പ്രതിപക്ഷ ബഞ്ചിൽ ഇരിക്കേണ്ടിവരുമെന്ന് തിരിച്ചറിഞ്ഞിട്ടുണ്ടെന്നും ഷാ ഉറപ്പിച്ചു പറഞ്ഞു.

കോൺഗ്രസ് നേതാവ് രാഹുൽ ഗാന്ധിയുടെ ഭാരത് ജോഡോ യാത്രയെക്കുറിച്ചുള്ള ചോദ്യത്തിന്, 1947 ലെ രാജ്യ വിഭജനത്തിന് തൻ്റെ പാർട്ടി ഉത്തരവാദിയായതിനാൽ ഇത്തരമൊരു മാർച്ചുമായി മുന്നോട്ട് പോകാൻ നെഹ്‌റു-ഗാന്ധി സന്തതികൾക്ക് അവകാശമില്ലെന്ന് അദ്ദേഹം പറഞ്ഞു. 2014 ൽ അധികാരം നഷ്ടപ്പെട്ടപ്പോൾ കോൺഗ്രസിൻ്റെ നേതൃത്വത്തിലുള്ള യുണൈറ്റഡ് പുരോഗമന സഖ്യം (യുപിഎ) എന്ത് കുഴപ്പമാണ് അവശേഷിപ്പിച്ചതെന്ന് അറിയാൻ രാജ്യത്തിന് പൂർണ അവകാശമുണ്ടെന്നും അതിന്റെ ഭാഗമാണ് സർക്കാർ പാർലമെൻ്റിൽ അവതരിപ്പിച്ച ധവളപത്രമെന്നും കേന്ദ്രമന്ത്രി പറഞ്ഞു.

ശ്രീരാമൻ ജനിച്ച സ്ഥലത്ത് ക്ഷേത്രം നിർമ്മിക്കണമെന്ന് രാജ്യത്തെ ജനങ്ങൾ 500-550 വർഷമായി വിശ്വസിച്ചിരുന്നതായി രാമക്ഷേത്രത്തെ ചൂണ്ടിക്കാട്ടി ആഭ്യന്തരമന്ത്രി പറഞ്ഞു. എന്നാൽ, പ്രീണന രാഷ്ട്രീയവും ക്രമസമാധാനപാലനവും ചൂണ്ടിക്കാട്ടി രാമക്ഷേത്ര നിർമാണം അനുവദിച്ചില്ലെന്നും അദ്ദേഹം പറഞ്ഞു. രാജ്യത്തിൻ്റെ പ്രഥമ പ്രധാനമന്ത്രി ജവഹർലാൽ നെഹ്‌റുവും മറ്റുള്ളവരും ഒപ്പുവെച്ച ഭരണഘടനാപരമായ അജണ്ടയാണ് ഏകീകൃത സിവിൽ കോഡെന്നും ഷാ പറഞ്ഞു.

‘എന്നാൽ പ്രീണനം മൂലം കോൺഗ്രസ് അത് അവഗണിച്ചു. ഉത്തരാഖണ്ഡിൽ യു.സി.സി നടപ്പാക്കുന്നത് ഒരു സാമൂഹിക മാറ്റമാണ്. ഇത് എല്ലാ വേദികളിലും ചർച്ച ചെയ്യുകയും നിയമപരമായ പരിശോധന നേരിടുകയും ചെയ്യും. ഒരു മതേതര രാജ്യത്തിന് മതാധിഷ്ഠിത സിവിൽ കോഡുകൾ ഉണ്ടാകില്ല’, അദ്ദേഹം പറഞ്ഞു.