സംസ്ഥാനത്തെ പോക്സോ കേസുകളിൽ പലതും ഒത്തുതീർപ്പാക്കാൻ ഇടനിലക്കാരായി പ്രവർത്തിക്കുന്നത് സർക്കാർ അഭിഭാഷകരെന്ന് ഇന്റലിജൻസ്

തിരുവനന്തപുരം: സംസ്ഥാനത്തെ പോക്സോ കേസുകളിൽ പലതും ഒത്തുതീർപ്പാക്കാൻ ഇടനിലക്കാരായി പ്രവർത്തിക്കുന്നത് സർക്കാർ അഭിഭാഷകരെന്ന് ഇന്റലിജൻസ്. പൊലീസ് മേധാവിയുടെ അധ്യക്ഷതയിൽ ചേർന്ന യോഗത്തിൽ ഇന്റലിജൻസ് മേധാവി അവതരിപ്പിച്ച റിപ്പോർട്ടിലാണ് ഇക്കാര്യം വ്യക്തമാക്കുന്നത്. സംസ്ഥാനത്ത് രജിസ്റ്റർ ചെയ്യുന്ന പോക്സോ കേസുകളിൽ പകുതിയോളം കോടതിയിലെത്തുമ്പോൾ പ്രതികളെ വെറുതെ വിടുകയാണ്. ഒത്തുതീർപ്പിന്റെ ഭാഗമായി ഇരകൾ മൊഴിമാറ്റുന്നതിനാലാണ് ഇങ്ങനെ സംഭവിക്കുന്നതെന്നും റിപ്പോർട്ടിൽ പറയുന്നു.

സർക്കാർ അഭിഭാഷകരിൽ പലരും ഇരകൾക്കുവേണ്ടിയല്ല ഇടപെടുന്നതെന്നാണ് ഇന്റലിജൻസ് മേധാവിയുടെ റിപ്പോർട്ടിൽ വ്യക്തമാക്കുന്നത്. പോക്സോ കേസുകളിൽ സർക്കാർ അഭിഭാഷകരുടെ പങ്ക് എന്താണെന്നു പരിശോധിക്കണമെന്ന് ഇന്റലിജൻസ് റിപ്പോർട്ടിൽ പറയുന്നു. എഫ്ഐആർ രജിസ്റ്റർ ചെയ്യുമ്പോൾതന്നെ പോക്സോ കേസുകളിൽ ക്രമക്കേടുകൾ ആരംഭിക്കുന്നതായി എഡിജിപി എം.ആർ.അജിത് കുമാർ ചൂണ്ടിക്കാട്ടി. ഇതേത്തുടർന്ന്, ഗൗരവമുള്ള കേസുകൾ ഡിഐജിമാരും ജില്ലാ പൊലീസ് മേധാവിമാരും പരിശോധിക്കണമെന്നു പൊലീസ് മേധാവി നിർദേശിച്ചു.

സംസ്ഥാനത്ത് 54 അതിവേഗ കോടതികളാണുള്ളത്. ഓരോ ജില്ലയിലും പ്രത്യേക കോടതികളുമുണ്ട്. 2010ൽ അതിവേഗ കോടതികളിൽ തീർപ്പാക്കാനുണ്ടായിരുന്നത് 3 കേസുകൾ മാത്രമായിരുന്നു. ഓരോ വർഷവും കേസുകൾ തീർപ്പാക്കാതെ വന്നതോടെ, 2010 മുതൽ 2022 ഡിസംബർവരെ അതിവേഗ കോടതികളിൽ തീർപ്പാക്കാൻ ശേഷിക്കുന്ന കേസുകൾ 7060 ആയി ഉയർന്നു. ജില്ലകളിലെ പ്രത്യേക കോടതികളിൽ 2023 ജൂലൈ 31 വരെയുള്ള കണക്കനുസരിച്ച് തീർപ്പാക്കാൻ ശേഷിക്കുന്നത് 8506 കേസുകളാണ്.

എഫ്ഐആർ രജിസ്റ്റർ ചെയ്യുമ്പോൾതന്നെ പോക്സോ കേസുകളിൽ ക്രമക്കേടുകൾ ആരംഭിക്കുന്നതായി ക്രമസമാധാന ചുമതലയുള്ള എഡിജിപി എം.ആർ.അജിത് കുമാർ യോഗത്തിൽ റിപ്പോർട്ട് ചെയ്തു. പേടിയും കുടുംബത്തിന്റെ അഭിമാനവും ഉപദ്രവവും കാരണം ഇരകളുടെ രക്ഷിതാക്കളിൽ പലരും കോടതിക്കു പുറത്ത് ഒത്തുതീർപ്പിനു തയാറാകുന്നു. രജിസ്റ്റർ ചെയ്യാത്ത പോക്സോ കേസുകളുടെ എണ്ണം വളരെ വലുതാണെന്നും അജിത് കുമാർ പറഞ്ഞു. പ്രതിയും ഇരയും പരസ്പരം ഒത്തുതീർപ്പിൽ എത്താമെങ്കിലും സർക്കാർ സംവിധാനം ഒരു കാരണവശാലും ഇത്തരം പ്രവർത്തനങ്ങളുടെ ഭാഗമാകരുതെന്നും പൊലീസ് മേധാവി നിർദേശിച്ചു.