കോട്ടയം: പാര്‍ക്കിംഗിനെ ചൊല്ലിയുണ്ടായ തര്‍ക്കവുമായി ബന്ധപ്പെട്ട് യുവാക്കളെ വെട്ടിക്കൊലപ്പെടുത്താന് ശ്രമിച്ച കേസില്‍ സഹോദരങ്ങൾ അറസ്റ്റിൽ. മുട്ടമ്പലം ചില്‍ഡ്രന്‍സ് പാര്‍ക്കിന് സമീപം വാടകയ്ക്ക് താമസിക്കുന്ന ചെങ്ങളം സൗത്ത് വടശേരില്‍ അരുണ്‍ സക്കറിയ (31), ഇയാളുടെ സഹോദരന്‍ ബ്രിജിത്ത് സക്കറിയ (35) എന്നിവരെയാണ് അറസ്റ്റ് ചെയ്തത്. കോട്ടയം ഈസ്റ്റ് പൊലീസ് ആണ് അറസ്റ്റ് ചെയ്തത്.
കഴിഞ്ഞദിവസം ഉച്ചയ്ക്ക് 12.30-ന് ആണ് സംഭവം. ഇരുവരും ചേര്‍ന്ന് പുതുപ്പള്ളി ഏറികാട് ഭാഗത്തുള്ള യുവാവിനെയും സുഹൃത്തുക്കളെയും വെട്ടിക്കൊലപ്പെടുത്താന് ശ്രമിക്കുകയായിരുന്നു. ഇവര്‍ വാടകയ്ക്ക് താമസിക്കുന്ന കോട്ടയം കളക്ടറേറ്റിന് അടുത്തുള്ള ചില്‍ഡ്രന്‍സ് പാര്‍ക്കിന് സമീപത്തെ വീടിന് മുന്‍വശത്തായി യുവാക്കള്‍ വെല്‍ഡിംഗ് ആവശ്യങ്ങള്‍ക്കായി വന്ന വാഹനം പാർക്ക് ചെയ്തതിനെയും ഇരുമ്പ് സ്‌ക്വയര്‍ പൈപ്പുകൾ ഇറക്കിയതിനെയും ചൊല്ലി വാക്കുതര്‍ക്കമുണ്ടായതിനെത്തുടര്‍ന്നാണ് കൊലപ്പെടുത്താന്‍ ശ്രമിച്ചത്.
അരുണ്‍ സക്കറിയക്ക് കുമരകം, കോട്ടയം ഈസ്റ്റ്, ഗാന്ധിനഗര്‍ എന്നീ സ്റ്റേഷനുകളില്‍ ക്രിമിനല്‍ കേസുണ്ട്. അറസ്റ്റിലായ പ്രതിയെ കോടതിയിൽ ഹാജരാക്കും.
Post Your Comments