പാലക്കാട് തിരുവാഴിയോടിൽ സ്വകാര്യ ബസ് അപകടത്തിൽപ്പെട്ട് രണ്ട് മരണം. ചെന്നൈയിൽ നിന്ന് കോഴിക്കോട്ടേക്ക് പോവുകയായിരുന്ന ബസാണ് മറിഞ്ഞത്. ഇന്ന് രാവിലെയാണ് അപകടം. നിയന്ത്രണം വിട്ടതോടെയാണ് ബസ് മറിഞ്ഞത്. യാത്രക്കാരായ ഒരു പുരുഷനും സ്ത്രീയുമാണ് മരിച്ചത്. കല്ലട ട്രാവൽസിന്റെ ബസാണ് അപകടത്തിൽപ്പെട്ടത്. കാർഷിക വികസന ബാങ്കിന് മുന്നിലാണ് അപകടം നടന്നത്.
ജീവനക്കാർ ഉൾപ്പെടെ 38 പേരാണ് ബസിൽ ഉണ്ടായിരുന്നത്. ഇതിൽ നിരവധി പേർക്ക് പരിക്കേറ്റിട്ടുണ്ട്. ബസ് ഉയർത്തിയതിന് ശേഷമാണ് യാത്രക്കാരെ പുറത്തെത്തിച്ചത്. അപകടത്തിൽ പരിക്കേറ്റ രണ്ട് പേരുടെ നില അതീവ ഗുരുതരമാണ്. പരിക്കേറ്റ യാത്രക്കാരെ നാട്ടുകാരും പോലീസും ഫയർഫോഴ്സും ചേർന്ന് സമീപത്തെ ആശുപത്രികളിൽ എത്തിച്ചു. പരിക്കേറ്റവരെ സമീപ ആശുപത്രികളിലും, പാലക്കാട് ജില്ലാ ആശുപത്രിയിലുമാണ് പ്രവേശിപ്പിച്ചിട്ടുള്ളത്. മരിച്ചവരിൽ ഒരാളുടെ മൃതദേഹം പാലക്കാട് ജില്ലാ ആശുപത്രിയിലും, ഒരാളുടെ മൃതദേഹം പെരിന്തൽമണ്ണയിലുമാണ് ഉള്ളത്.
Post Your Comments