യാത്രക്കാർക്ക് ഗംഭീര ഓഫറുമായി എയർ ഇന്ത്യ! കുറഞ്ഞ നിരക്കിൽ ടിക്കറ്റുകൾ സ്വന്തമാക്കാം, ഓഫർ വിൽപ്പന ഇന്ന് അവസാനിക്കും

ആഭ്യന്തര, അന്താരാഷ്ട്ര വിമാന ടിക്കറ്റുകൾ കുറഞ്ഞ വിലയിൽ സ്വന്തമാക്കാൻ അവസരവുമായി ടാറ്റാ ഗ്രൂപ്പിന്റെ ഉടമസ്ഥതയിലുള്ള വിമാന കമ്പനിയായ എയർ ഇന്ത്യ. നാല് ദിവസം നീണ്ടുനിന്ന ഓഫർ വിൽപ്പന ഇന്ന് അവസാനിക്കും. ഓഗസ്റ്റ് 17 മുതലാണ് യാത്രക്കാർക്ക് കുറഞ്ഞ നിരക്കിൽ എയർ ഇന്ത്യ ടിക്കറ്റുകൾ ബുക്ക് ചെയ്യാനുള്ള അവസരം ഒരുക്കിയത്. ആഭ്യന്തര വിമാന ടിക്കറ്റുകൾ 1,470 രൂപ മുതൽ സ്വന്തമാക്കാനാകും. ബിസിനസ് ക്ലാസ് ടിക്കറ്റുകളുടെ നിരക്ക് 10,130 രൂപ മുതലാണ് ആരംഭിക്കുന്നത്.

ഈ വർഷം സെപ്റ്റംബർ ഒന്ന് മുതൽ ഒക്ടോബർ 31 വരെ ആഭ്യന്തര, അന്തർദേശീയ റൂട്ടുകളിലെ യാത്രയ്ക്കായാണ് ടിക്കറ്റ് ബുക്ക് ചെയ്യാൻ സാധിക്കുക. എയർ ഇന്ത്യയുടെ ഔദ്യോഗിക വെബ്സൈറ്റ്, മൊബൈൽ ആപ്പ്, അംഗീകൃത ട്രാവൽ ഏജന്റുമാർ, അംഗീകൃത ട്രാവൽ ഏജൻസികൾ എന്നിവ മുഖാന്തരം ടിക്കറ്റ് ബുക്ക് ചെയ്യാവുന്നതാണ്. അതേസമയം, റിസർവേഷനുകൾക്ക് കൺവീനിയൻസ് ഫീസ് ബാധകമല്ലെന്ന് എയർ ഇന്ത്യ അറിയിച്ചിട്ടുണ്ട്. യാത്രക്കാർക്ക് മിതമായ നിരക്കിൽ യാത്ര ചെയ്യാനുള്ള അവസരമാണ് പുതിയ ഓഫറിലൂടെ എയർ ഇന്ത്യ ഒരുക്കുന്നത്.

Also Read: സിനിമയിൽ അവസരം വാ​ഗ്‍ദാനം ചെയ്ത് പ്രായപൂർത്തിയാകാത്ത പെൺകുട്ടിയെ പീഡിപ്പിച്ച യുവ സംവിധായകൻ അറസ്റ്റിൽ