കൊച്ചിയില്‍ ഇതര സംസ്ഥാന തൊഴിലാളിയെ സുഹൃത്ത് കഴുത്തുഞെരിച്ചു കൊന്നു: കൊലപാതകം മദ്യപിച്ചുണ്ടായ കലഹത്തെ തുടര്‍ന്ന് 

കൊച്ചി: കൊച്ചിയില്‍ ഇതര സംസ്ഥാന തൊഴിലാളിയെ സുഹൃത്ത് കഴുത്തുഞെരിച്ചു കൊന്നു. ബംഗാൾ സ്വദേശി ആസാദിനെ കൂടെയുണ്ടായിരുന്ന സക്കീറാണ് കൊലപ്പെടുത്തിയത്. മദ്യപിച്ചുണ്ടായ കലഹത്തെ തുടര്‍ന്നാണ് കൊലപാതകം.

ബുധനാഴ്ച പുലർച്ചെ മൂന്നുമണിയോടെ കൊച്ചിയിലെ മസ്ജിദ് റോഡിലെ താമസസ്ഥലത്താണ് സംഭവം. പുലർച്ചെ ഇവർ തമ്മിൽ ബഹളമുണ്ടായത് അയൽക്കാർ കേട്ടിരുന്നു. ഇവർ ഓടിയെത്തിയ സമയത്ത് ഒരാൾ കൈയിൽ സ്റ്റൂളുമായി നിൽക്കുന്നത് കണ്ടു. അയൽവാസികൾ വാതിൽ ചവിട്ടിപ്പൊളിക്കാൻ ശ്രമിച്ചതോടെ ഇയാൾ തടഞ്ഞു. പിന്നീട് പോലീസെത്തി വാതിൽ പൊളിച്ച് അകത്തു കടന്നതോടെ ആസാദിനെ മരിച്ചനിലയിൽ കണ്ടെത്തുകയായിരുന്നു.

രണ്ടുപേരും ചൊവ്വാഴ്ചയാണ് കൊച്ചിയിലെത്തിയത്. നിലവിൽ ഇവർ താമസിക്കുന്നയിടത്ത് ഇരുപതോളം ഇതര സംസ്ഥാന തൊഴിലാളികൾ വേറെയുമുണ്ട്. പ്രതിയായ സക്കീറിനെ വിശദമായി ചോദ്യം ചെയ്യുകയാണ്.