അച്ഛൻ്റെ സഹോദരിയെ സ്ഥിരമായി ലെെംഗിക പീഡനത്തിന് ഇരയാക്കും, അന്ന് പീഡിപ്പിക്കാൻ ശ്രമിക്കുന്നതിനിടെ വൃദ്ധ ചെറുത്തു

കൊച്ചി: പരിക്കുകളോടെ ആശുപത്രിയിൽ എത്തിച്ച 65കാരി മരണപ്പെട്ട സംഭവത്തിൽ പുറത്ത് വന്നത് ഞെട്ടിക്കുന്ന വിവരങ്ങൾ. വൃദ്ധയ്ക്ക് പരിക്കേറ്റത് ലൈംഗിക പീഡനത്തിനിടെയെന്ന് തെളിഞ്ഞതായി പോസ്റ്റുമോർട്ടം റിപ്പോർട്ടിൽ വ്യക്തമായി. സംഭവത്തിൽ വൃദ്ധയുടെ സഹോദരൻ്റെ മകനെ ശനിയാഴ്ച സെൻട്രൽ പൊലീസ് അറസ്റ്റുചെയ്തിരുന്നു. കഴിഞ്ഞ ദിവസം നടന്ന ചോദ്യം ചെയ്യലിനിടെയാണ് നടന്ന സംഭവങ്ങൾ നാൽപ്പത്തിയഞ്ചുകാരനായ പ്രതി പൊലീസിനോട് വിവരിച്ചത്. പ്രതി കുറ്റം സമ്മതിച്ച പശ്ചാത്തലത്തിൽ പ്രതിയുടെ അടുത്ത ബന്ധുക്കളിലും അയൽവാസികളിലും നിന്ന് വിശദമായി മൊഴി രേഖപ്പെടുത്തുമെന്ന് എസ്എച്ച്ഒ വിജയ ശങ്കർ വ്യക്തമാക്കി.

പ്രതിയെ മജിസ്‌ട്രേറ്റിന് മുന്നിൽ ഹാജരാക്കി റിമാൻഡ് ചെയ്തിരിക്കുകയാണ്. ഇക്കഴിഞ്ഞ വെള്ളിയാഴ്ച പുലർച്ചെ രണ്ടു മണിയോടെയാണ് വൃദ്ധയെ ആശുപത്രിയിൽ പ്രവേശിപ്പിക്കുന്നത്. പിതൃസഹോദരിയെ പ്രതിയും ബന്ധുക്കളും ചേർന്നാണ് അബോധാവസ്ഥയിൽ കച്ചേരിപ്പടിയിലെ ശ്രീ സുധീന്ദ്ര ആശുപത്രിൽ എത്തിച്ചത്. എന്നാൽ ആശുപത്രിയിൽ എത്തിക്കുന്നതിന് മുൻപ് തന്നെ വൃദ്ധ മരണമടഞ്ഞിരുന്നു. പരിശമാധനയ്ക്കിടെ വൃദ്ധയുടെ മുഖത്തെ പാടുകൾ കണ്ട ഡോക്ടർക്ക് മരണത്തിൽ സംശയം ഉടലെടുക്കുകയായിരുന്നു.

സംശയം തോന്നിയ ഡോക്ടർ ഇക്കാര്യം പൊലീസിനെ അറിയിച്ചു. അതേസമയം സ്ഥലത്തെത്തിയ പൊലീസിന് വൃദ്ധയുടെ സഹോദര പുത്രനിൽ സംശയം ഉടലെടുക്കുകയായിരുന്നു. ഇയാളുടെ പെരുമാറ്റം സംശയാസ്പദമായിരുന്നുവെന്ന് പൊലീസ് പറഞ്ഞു. അതേസമയം, വൃദ്ധയും പ്രതിയായ സഹോദരൻ്റെ മകനും തമ്മിൽ കുടുംബവഴക്ക് പതിവായിരുന്നെന്നും അയൽവാസികൾ പൊലീസിനോട് വ്യക്തമാക്കി. വൃദ്ധ വീട്ടു ജോലിക്കും മറ്റും പോയാണ് കഴിഞ്ഞിരുന്നത്.

എന്നാൽ കുറച്ചു മാസങ്ങളായി ഇവർ വീട്ടു ജോലിക്ക് പോകുന്നുണ്ടായിരുന്നില്ല. ഇതിനെച്ചൊല്ലി പ്രതിയായ സഹോദരൻ്റെ മകനും ഇവരും തമ്മിൽ വഴക്കുണ്ടായിരുന്നതായും പൊലീസ് പറയുന്നുണ്ട്.  തുടർന്ന് ഇയാളെ പൊലീസ് കസ്റ്റഡിയിലെടുത്ത് സ്റ്റേഷനിൽ കൊണ്ടുപോയി. പോസ്റ്റുമോർട്ടം റിപ്പോർട്ട് ലഭിച്ചതോടെയാണ് പ്രതിയെ കൂടുതൽ ചോദ്യം ചെയ്യാൻ പൊലീസ് തീരുമാനിച്ചത്. പൊലീസ് നടത്തിയ ചോദ്യം ചെയ്യലിൽ പ്രതി കുറ്റം സമ്മതിക്കുകയായിരുന്നു. വൃദ്ധയെ നിരന്തരം പീഡിപ്പിച്ചിരുന്നതായും പ്രതി വ്യക്തമാക്കി. ഇതോടെ അന്വേഷണ ഉദ്യോഗസ്ഥർ പ്രതിയുടെ അറസ്റ്റ് രേഖപ്പെടുത്തി.

വൃദ്ധയെ ഇയാൾ നിരവധി ദിവസങ്ങളിൽ ലൈംഗികമായി പീഡിപ്പിച്ചിരുന്നുവെന്നാണ് പുറത്തു വരുന്ന വിവരം. സംഭവദിവസവും പ്രതി വൃദ്ധയുടെ വീട്ടിലെത്തി. ലൈംഗികമായി പീഡിപ്പിക്കുന്നതിനിടെ വൃദ്ധ ചെറുത്തു. ഇതോടെ പ്രതി ബലമായി വൃദ്ധയെ പീഡിപ്പിക്കാൻ ശ്രമിച്ചു. ഇതിനിടെ ബലപ്രയോഗത്തിൽ വൃദ്ധ ശ്വാസംമുട്ടി മരിക്കുകയായിരുന്നു .