തിരുവനന്തപുരം: ബീഡി ചോദിച്ചിട്ട് നൽകാത്തതിന്റെ വൈരാഗ്യത്തിൽ യുവാവിനെ ആക്രമിച്ച അയൽവാസി അറസ്റ്റിൽ. പൗണ്ടകുളം കോളനിയിലെ 100-ാം നമ്പർ വീട്ടിൽ താമസിക്കുന്ന ഉല്ലാസ് കുമാറിനെയാണ് കന്റോൺമെന്റ് പോലീസ് അറസ്റ്റ് ചെയ്തത്. ബീഡി നൽകാത്തതിന്റെ പേരിൽ അയൽവാസിയായ സുനിൽ കുമാറിനെ ഇയാൾ കുത്തിക്കൊല്ലാൻ ശ്രമിക്കുകയായിരുന്നു.
തിരുവനന്തപുരം തൈക്കാട് പൗണ്ടുകുളത്ത് തിങ്കളാഴ്ച ഉച്ചയോടെയായിരുന്നു സംഭവം. ബീഡി ചോദിച്ചിട്ട് നൽകാത്തതിൽ ഇരുവരും തമ്മിൽ തർക്കം നടന്നിരുന്നു. തുടർന്ന് സുനിൽ കുമാറിനെ വീടിന് മുന്നിൽ ഇയാൾ തടഞ്ഞു നിർത്തി. വാഗ്വാദത്തിന് പിന്നാലെ പ്രതി ഉല്ലാസ് കൈയിൽ കരുതിയിരുന്ന കത്തികൊണ്ട് കുത്തുകയായിരുന്നുവെന്നാണ് പോലീസ് പറഞ്ഞത്.
സംഭവത്തിൽ ഗുരുതരമായി പരിക്കേറ്റ സുനിൽ കുമാറിനെ ആശുപത്രിയിൽ പ്രവേശിപ്പിച്ചിരിക്കുകയാണ്. കന്റോൺമെന്റ് എസ്എച്ച്ഒ ഷാഫി, എസ്‌ഐഎ ദിൽജിത്ത്, ഷെഫിൻ എന്നിവരടങ്ങിയ സംഘമാണ് പ്രതിയെ പിടികൂടി കോടതിയിൽ ഹാജരാക്കിയത്. ഉല്ലാസിനെ റിമാൻഡ് ചെയ്തിരിക്കുകയാണ്.
Post Your Comments