ശ്രീകണ്ഠപുരം: മയ്യിൽ കുറ്റ്യാട്ടൂരിൽ ഉത്സവാഘോഷത്തിനിടെ പൊലീസുകാരെ കൈയേറ്റം ചെയ്ത യുവാവ് അറസ്റ്റിൽ. മയ്യിൽ എട്ടേയാര്‍ സ്വദേശി കുന്നുമ്മല്‍ ഹൗസില്‍ പ്രനീഷി(31)നെയാണ് അറസ്റ്റ് ചെയ്തത്. മയ്യിൽ എസ്.എച്ച്.ഒ ഇൻസ്പെക്ടർ ടി.പി സുമേഷ് ആണ് ഇയാളെ അറസ്റ്റ് ചെയ്തത്.
കുറ്റ്യാട്ടൂര്‍ കൂറുമ്പക്കാവിലെ ഉത്സവാഘോഷത്തിനിടയിലായിരുന്നു കേസിനാസ്പദമായ സംഭവം. ഞായറാഴ്ച പുലര്‍ച്ചെ ഒരു മണിയോടെ കാവിലേക്ക് കലശ ഘോഷയാത്ര പ്രവേശിക്കവെ പ്രനീഷ് മദ്യലഹരിയില്‍ കലശത്തിനുനേരെ മോശമായി പെരുമാറി. തുടർന്ന്, പൊലീസ് ഇടപെട്ട് പിന്തിരിപ്പിക്കാന്‍ ശ്രമിക്കുന്നതിനിടെ പൊലീസുകാരെ ആക്രമിക്കുകയായിരുന്നു. പിന്നീട് കൂടുതല്‍ പൊലീസുകാരെത്തിയാണ് പ്രനീഷിനെ കസ്റ്റഡിയിലെടുത്തത്.
എസ്.ഐ എ.പി. ചന്ദ്രന്‍, എ.എസ്.ഐമാരായ മനു, പ്രദീപന്‍, രാജീവന്‍, സി.പി.ഒമാരായ വിജില്‍, ഫാസില്‍, പ്രതീഷ്, ജിനീഷ് എന്നിവരും പ്രനീഷിനെ പിടികൂടിയ സംഘത്തിലുണ്ടായിരുന്നു. പ്രതിയെ കോടതിയിൽ ഹാജരാക്കിയ ശേഷം റിമാൻഡ് ചെയ്തു.
Post Your Comments