കടുത്തുരുത്തി: സ്വകാര്യ ബസും ബൈക്കും കൂട്ടിയിടിച്ചുണ്ടായ അപകടത്തിൽ ബൈക്ക് യാത്രക്കാരായ ദമ്പതികൾക്ക് ഗുരുതര പരിക്കേറ്റു. വൈക്കം കുലശേഖരമംഗലം കൂവക്കാട്ടിൽ മുഹമ്മദ് (31), ഭാര്യ ലൂബീബ (28) എന്നിവർക്കാണ് പരിക്കേറ്റത്.
ഇന്നലെ ഉച്ചയ്ക്കു രണ്ടോടെ തലയോലപ്പറമ്പ് – കടുത്തുരുത്തി റോഡിൽ ആപ്പാംഞ്ചിറ വളവിന് സമീപമാണ് അപകടം നടന്നത്. മറ്റൊരു വാഹനത്തെ മറികടന്നുവന്ന സ്വകാര്യ ലിമിറ്റഡ് സ്റ്റോപ്പ് ബസ് എതിർദിശയിൽ വരികയായിരുന്ന ബൈക്കിൽ ഇടിക്കുകയായിരുന്നു. ഇടിയുടെ ആഘാതത്തിൽ ബൈക്ക് ബസിനടിയിലകപ്പെടുകയായിരുന്നു.
റോഡിൽ തെറിച്ചു വീണ ഇരുവരെയും ഓടിയെത്തിയ നാട്ടുകാർ മുട്ടുചിറ എച്ച്ജിഎം ആശുപത്രിയിലും പിന്നീട് തെള്ളകത്തെ ആശുപത്രിയിലേക്കും മാറ്റി. എറണാകുളത്തു നിന്നും കോട്ടയത്തിനു പോവുകയായിരുന്ന എം ആൻഡ് എം ബസാണ് അപകടമുണ്ടാക്കിയത്.
അപകടത്തെത്തുടർന്ന്, തലയോലപ്പറമ്പ് – കടുത്തുരുത്തി റൂട്ടിൽ അരമണിക്കൂറോളം ഗതാഗതം തടസപ്പെട്ടു. കടുത്തുരുത്തി എസ്ഐ ബിബിൻ ചന്ദ്രൻ, എഎസ്ഐമാരായ പി.എസ്. ബാബു, റജിമോൻ എന്നിവരുടെ നേതൃത്വത്തിൽ സ്ഥലത്തെത്തിയ പൊലീസ് സംഘമാണ് ഗതാഗതം പുനഃസ്ഥാപിച്ചത്.
Post Your Comments