ചെന്നൈ: കാമുകിയെ കുത്തി പരുക്കേൽപ്പിച്ച യുവാവ് അറസ്റ്റില്‍. തമിഴ്‌നാട് വെല്ലൂർ തിരുവല്ലത്താണ് കാമുകി മറ്റാരെയോ പ്രണയിക്കുന്നുവെന്ന സംശയത്തെ തുടര്‍ന്ന് യുവാവ് കൊലപാതകത്തിന് ശ്രമിച്ചത്. സംഭവത്തിൽ ഗുപ്പതമൊട്ടൂർ സ്വദേശി സതീഷിനെ (28) പോലീസ് അറസ്റ്റ് ചെയ്തു.
പേനാ കത്തികൊണ്ട് ഇയാള്‍ യുവതിയെ കുത്തി കൊല്ലാൻ ശ്രമിക്കുകയായിരുന്നു. അതിഗുരുതരമായി പരുക്കേറ്റ പെൺകുട്ടി നിലവിൽ ആശുപത്രിയിലാണ്. കോളേജിലേക്ക് പോകാനായി പെൺകുട്ടി ബസ് സ്റ്റോപ്പിലെത്തിയപ്പോഴാണ് ആക്രമണമുണ്ടായത്. പെൺകുട്ടിയുടെ മുഖത്തും കഴുത്തിലും കുത്തേറ്റിട്ടുണ്ടെന്ന് ഡോക്ടർമാർ പറഞ്ഞു. കുത്തേറ്റ് വീണ പെൺകുട്ടിയെ നാട്ടുകാർ ആണ് ആശുപത്രിയിലെത്തിച്ചത്.
വെല്ലൂരിലുള്ള ഒരു സ്വകാര്യ കോളേജിലെ ഓപ്‌റ്റോമെട്രിക്‌സ് വിദ്യാർത്ഥിയാണ് പ്രതി. റാണിപേട്ടയിലെ കോളേജിലാണ് പെൺകുട്ടി പഠിക്കുന്നത്. ഇരുവരും തമ്മിൽ കഴിഞ്ഞ മൂന്ന് വർഷമായി പ്രണയത്തിലാണ്. ഇതിനിടെയാണ് സതീഷിന് പെൺകുട്ടിയിൽ സംശയം വരികയും ഇക്കാര്യം സംസാരിക്കാൻ ബസ് സ്റ്റോപ്പിലെത്തുകയും ചെയ്തത്. ഇരുവരും തമ്മിൽ വാക്കുതർക്കമുണ്ടായതിന് പിന്നാലെ കയ്യിൽ കരുതിയിരുന്ന പേനാകത്തി ഉപയോഗിച്ച് സതീഷ് പെൺകുട്ടിയെ ആക്രമിക്കുകയായിരുന്നു.
Post Your Comments