‘അടിച്ച് മൂക്കാമണ്ട കലക്കിയേനെ, പുള്ളാര് കേറിയങ്ങ് ഉടുത്തു കളയും’: റോബിന്റെ വീഡിയോയ്ക്ക് ട്രോളുമായി ഉബൈദ് ഇബ്രാഹിം

ബിഗ് ബോസ് മലയാളം നാലാം സീസൺ അതിന്റെ അവസാന ഘട്ടത്തിലേക്ക് കടക്കുകയാണ്. ഇന്നാണ് ഫിനാലെ. റിയാസ്, ബ്ലെസ്‌ലി, ദില്ഷ എന്നിവരാണ് ടോപ്പ് 3 യിൽ നിൽക്കുന്നതെന്നാണ് സൂചന. ബിഗ് ബോസ് നാലാം സീസണിലെ ഏറ്റവും നിർണായകമായ ഒന്നായിരുന്നു ഡോക്ടർ റോബിൻ രാധാകൃഷ്ണന്റെ പുറത്താവലും തുടർന്നുള്ള നാടകീയമായ രംഗങ്ങളും. കഴിഞ്ഞ ദിവസം റോബിൻ അടക്കമുള്ള എവിക്ട് ആയ സഹമത്സരാർത്ഥികളെ ബിഗ് ബോസ് വീട്ടിനുള്ളിലേക്ക് കടത്തിവിട്ടിരുന്നു. ഇതിന് പിന്നാലെ, ബ്ലെസ്‌ലിയെയും ബ്ലെസ്‌ലിയുടെ ആരാധകരെയും ഭീഷണിപ്പെടുത്തിക്കൊണ്ടുള്ള ഒരു വീഡിയോ റോബിൻ പുറത്തുവിട്ടിരുന്നു. ഇതിനെ ട്രോളുകയാണ് ഉബൈദ് ഇബ്രാഹിം.

ദിൽഷയോട് ബ്ലെസ്‌ലിയെ സൂക്ഷിക്കണമെന്നും ഒറ്റയ്ക്ക് ബാത്രൂം ഏരിയയിലേക്ക് പോകരുതെന്നുമെല്ലാം റോബിൻ ഉപദേശിക്കുന്ന വീഡിയോയ്ക്കും വലിയ രീതിയിൽ ട്രോൾ ലഭിച്ചു. ബ്ലെസ്‌ലിയുടെ ആരാധകരെയും റോബിനെയുമാണ് ഉബൈദ് ഇബ്രാഹിം തന്റെ വീഡിയോയിലൂടെ ട്രോളുന്നത്. രസകരമായ വീഡിയോയ്ക്ക് നിരവധി പ്രതികരണങ്ങളാണ് എത്തുന്നത്.

ബ്ലെസി തന്റെ സഹോദരൻ ആയിരുന്നു എന്നും എന്നാൽ ദിൽഷയോട് അപമര്യാദയായി പെരുമാറിയതുകൊണ്ടുമാണ് ഇങ്ങനെ പറയുന്നത് എന്നുമാണ് റോബിൻ പറയുന്നത്. പുറത്തായിരുന്നെങ്കിൽ ‘അടിച്ച് മൂക്കാമണ്ട കലക്കിയേനെ’ എന്ന റോബിന്റെ രൂക്ഷ വിമർശനം ബ്ലേസ്‌ലിയുടെ ആരാധകർക്ക് കടുത്ത സമ്മർദ്ദം ഉണ്ടാക്കുന്നുണ്ട്. ഇതിനേയും ഉബൈദിന്റെ ട്രോളിലൂടെ കളിയാക്കുന്നുണ്ട്. ബിഗ് ബോസ് വീടിനുള്ളിൽ ഉള്ളതിനേക്കാൾ സംഘർഷഭരിതമാണ് പുറത്തെ അവസ്ഥയെന്നാണ് സോഷ്യൽ മീഡിയയിൽ നിന്നും വരുന്ന പ്രതികരണം.