മധ്യപ്രദേശിൽ ദിനോസർ മുട്ട കണ്ടെത്തി, അസാധാരണമെന്ന് ഗവേഷകർ

മധ്യപ്രദേശിൽ ഫോസിലൈസ്ഡ് ദിനോസർ മുട്ട കണ്ടെത്തി. ഡൽഹി സർവ്വകലാശാലയിലെ ഒരു സംഘം ഗവേഷകരാണ് മുട്ടകളുടെ കൂട്ടം കണ്ടെത്തിയത്. ഇതിന്റെ ചിത്രവും ഇവർ പുറത്തുവിട്ടിട്ടുണ്ട്. മധ്യപ്രദേശിലെ ധാർ ജില്ലയിലെ ദിനോസർ ഫോസിൽ ദേശീയ ഉദ്യാനത്തിൽ നിന്നാണ് മുട്ട കിട്ടിയത്. ഒന്ന് മറ്റൊന്നിനുള്ളിൽ കൂടുണ്ടാക്കിയ നിലയിലാണ് മുട്ടകൾ ഉള്ളത്. സൗരോപോഡ് ദിനോസറുകളുടെ വൈവിധ്യമാർന്ന ഗ്രൂപ്പായ ടൈറ്റനോസറുകളുടേതാണ് ഈ മുട്ടകൾ.

നേച്ചർ ഗ്രൂപ്പ് ജേണലായ സയന്റിഫിക് റിപ്പോർട്ടിൽ ഇതിനെക്കുറിച്ച് പറയുന്നത്, ‘ദിനോസറുകളുടെ പ്രത്യുത്പാദന ജീവശാസ്ത്രത്തിലേക്ക് വെളിച്ചം വീശുന്ന കണ്ടെത്തൽ’ എന്നാണ്. ദിനോസറുകളുടെ മുട്ടകൾക്കുള്ളിൽ മറ്റൊരു മുട്ട എന്ന പ്രതിഭാസം ആദ്യമായാണ് ശാസ്ത്രജ്ഞർ കണ്ടെത്തുന്നത്. പക്ഷികളിൽ മാത്രമേ ഇത് കാണപ്പെടുന്നുള്ളൂ. ഉരഗങ്ങളിൽ ഒരിക്കലും കണ്ടെത്തിയിട്ടില്ല. അവയുടെ സ്വഭാവത്തെ കുറിച്ച് കൂടുതൽ പഠനം നടത്താൻ ഈ മുട്ടകൾ കൊണ്ട് സാധിക്കുമെന്നാണ് ഗവേഷകർ പ്രതീക്ഷിക്കുന്നത്.

Also Read:പുത്തൻ തൊഴിലവസരങ്ങളുമായി ജിടെക്, ജോബ് ഫെയർ ജൂലൈ 16 ന്

‘ടൈറ്റനോസോറിഡ് ദിനോസർ കൂടിൽ നിന്ന് അണ്ഡ-ഇൻ-ഓവോ മുട്ടയുടെ കണ്ടെത്തൽ സൂചിപ്പിക്കുന്നത്, അവയുടെ അണ്ഡവാഹിനി രൂപഘടന ഈ സോറോപോഡ് ദിനോസറുകളുടെ ഗ്രൂപ്പിൽ തുടർച്ചയായി മുട്ടയിടുന്നതിനുള്ള സാധ്യത ഉണ്ടെന്നാണ്. അസ്വാഭാവികവും രോഗാവസ്ഥയിലുമായ മുട്ടകളാണ് കിട്ടിയത്. മുട്ടത്തോടിൽ പ്രതിഫലിക്കുന്ന അസാധാരണത്വങ്ങളിൽ, പരസ്പരം അടുത്തിടപഴകുന്ന ഒന്നിലധികം മുട്ട ഷെൽ യൂണിറ്റുകൾ കണ്ടെത്തി. ഒന്നിനു മുകളിൽ മറ്റൊന്ന് (മൾട്ടി ഷെൽഡ്), അസാധാരണമായ കട്ടിയുള്ളതോ നേർത്തതോ ആയ മുട്ടത്തോടുകൾ, അസാധാരണമായ ആകൃതിയിലുള്ള ഷെൽ യൂണിറ്റുകൾ, സുഷിര ചാലുകളെ തടയുന്ന അധിക ഷെൽ യൂണിറ്റുകൾ, ഉപരിതല വൈകല്യങ്ങൾ എന്നിവയാണുള്ളത്’, ജേണലിൽ പ്രസിദ്ധീകരിച്ച ഗവേഷണം പറയുന്നു.