ടിപ്പു സുൽത്താന്റെ കൊട്ടാരം സ്ഥിതി ചെയ്യുന്നത് ക്ഷേത്രഭൂമിയിൽ, സർവ്വേ നടത്തണമെന്ന് ആവശ്യം

മൈസൂർ: കർണാടകയിലെ ബെംഗളൂരുവിലെ ടിപ്പു സുൽത്താൻ കൊട്ടാരം പണികഴിപ്പിച്ചത് ക്ഷേത്രഭൂമിയിൽ ആണെന്ന് അവകാശവാദം. കൊട്ടാരത്തിന്റെ ഉത്ഭവം കണ്ടെത്തുന്നതിനായി സർവ്വേ നടത്തണമെന്ന ആവശ്യവുമായി ഹിന്ദു ജനജാ​ഗ്രതി സമിതി. ക്ഷേത്രഭൂമി കയ്യേറിയാണ് ടിപ്പു സുൽത്താൻ കൊട്ടാരം പണിതതെന്ന് സമിതി ആരോപിച്ചു. ഭൂമി അളന്ന് തിട്ടപ്പെടുത്തണമെന്ന് സംഘടനയുടെ വക്താവ് മോഹൻ ഗൗഡ ആവശ്യപ്പെട്ടു. വാരണാസിയിലെ ​ഗ്യാൻവാപി പള്ളിയ്ക്കും, ചരിത്രസ്മാരകമായ കുത്തബ് മിനാറിനും പിന്നാലെയാണ് പുതിയ വിവാദം.

‘ബെംഗളൂരുവിലെ ടിപ്പു സുൽത്താൻ കൊട്ടാരത്തെക്കുറിച്ച് പലരും മുൻപും പറഞ്ഞിട്ടുണ്ട്. മുമ്പ് ഈ സ്ഥലം കോട്ടെ വെങ്കിട്ടരമണ സ്വാമി ക്ഷേത്രത്തിന്റെ വകയായിരുന്നു. ടിപ്പു സുൽത്താന്റെ ഭരണകാലത്ത് ഇത് കൈയ്യേറ്റം ചെയ്യപ്പെടുകയായിരുന്നു. ചിലർ പറയുന്നതനുസരിച്ച്, ആ സ്ഥലത്ത് വേദങ്ങൾ പഠിപ്പിച്ചിട്ടുണ്ട്. ഭൂമി അളന്ന് അതിന്റെ യഥാർത്ഥ ഉടമയ്ക്ക് കൈമാറണമെന്ന് ഹിന്ദു ജനജാഗൃതി സമിതിക്ക് വേണ്ടി, ഞാൻ ആവശ്യപ്പെടുന്നു’, ഗൗഡ പറഞ്ഞു.

അതേസമയം, വാരണാസി ​ഗ്യാൻവാപി മസ്ജിദിനും കുത്തബ് മിനാറിനുമെതിരെ സമാന ആരോപണങ്ങളുമായാണ് ഹിന്ദുത്വ വാദികൾ രം​ഗത്തെത്തിയിരുന്നത്. വാരണാസി ക്ഷേത്രത്തിനോട് ചേർന്നുള്ള ​ഗ്യാൻവാപി പള്ളിയുടെ ചുമരുകളിലുള്ള ഹിന്ദു വി​ഗ്രഹങ്ങളെ ആരാധിക്കാൻ അനുവദിക്കണെന്ന് ആവശ്യപ്പെട്ട് നൽകിയ ഹരജികളിൽ നിന്നായിരുന്നു ​ഗ്യാൻവാപി കേസിന്റെ തുടക്കം. ഇതിനു പിന്നാലെ, ചരിത്രസ്മാരകമായ കുത്തബ് മിനാറിന്റെ തൂണിൽ നിന്നും ഹിന്ദു ആരാധനാപാത്രങ്ങളുടെ ശിൽപം കണ്ടെത്തിയെന്ന് ചൂണ്ടിക്കാട്ടിയായിരുന്നു കുത്തബ് മിനാറിനെതിരെയും സംഘടനകൾ രംഗത്ത് വന്നത്.