ഐപിഎല്ലില്‍ സഞ്ജുവിന്റെ രാജസ്ഥാൻ റോയൽസ് ഇന്നിറങ്ങും

മുംബൈ: ഐപിഎല്ലില്‍ രാജസ്ഥാൻ റോയൽസ് ഇന്നിറങ്ങും. ഗുജറാത്ത് ടൈറ്റൻസാണ് റോയൽസിന്റെ എതിരാളികൾ. രാത്രി 7.30ന് മുംബൈ ഡിവൈ പാട്ടീൽ സ്റ്റേഡിയത്തിലാണ് മത്സരം. ജയം തുടരാൻ രാജസ്ഥാൻ ഇറങ്ങുമ്പോൾ, വിജയവഴിയിൽ തിരിച്ചെത്താനാണ് ഗുജറാത്തിന്‍റെ ലക്ഷ്യം. സീസണിലെ ഏറ്റവും സന്തുലിതമായ നിരയാണ് രാജസ്ഥാൻ റോയല്‍സിന്റേത്.

ദേവ്ദത്ത് പടിക്കലിന് ഓപ്പണിങ്ങിലേക്ക് പ്രമോഷൻ നൽകിയതിലൂടെ മുൻനിര മികച്ച ഫോമിലാണ്. നായകൻ സഞ്ജു സാംസണിന് പുറമെ ഷിമ്രോൺ ഹെറ്റ്മെയർ, റാസ്സി വാൻഡർ ഡസൻ, റിയാൻ പരാഗ് തുടങ്ങിയ താരങ്ങൾ ശക്തരാണ്. ട്രെന്‍റ് ബോൾട്ട്, പ്രസിദ്ധ് കൃഷ്ണ, യുസ്‌വേന്ദ്ര ചാഹൽ, ആര്‍ അശ്വിൻ എന്നിവരടങ്ങുന്ന ബൗളിംഗിലും ആശങ്കയില്ല.

Read Also:- ഈ ഭക്ഷണങ്ങൾ വെറും വയറ്റില്‍ കഴിക്കാന്‍ പാടില്ല!

അതേസമയം പോയിന്‍റ് പട്ടികയിൽ ആദ്യ നാലിലുണ്ടെങ്കിലും ബാറ്റിംഗിലും ബൗളിംഗിലും ആശങ്കയുണ്ട് ഗുജറാത്തിന്. ശുഭ്മാൻ ഗില്ലും ഹാർദിക് പാണ്ഡ്യയും ഉത്തരവാദിത്തം ഒറ്റയ്ക്ക് നിറവേറ്റേണ്ട അവസ്ഥയാണ്. രാഹുല്‍ തെവാത്തിയയുടെ ഫിനിഷിംഗ് മികവിൽ മാത്രമാണ് പ്രതീക്ഷ. ലോക്കി ഫെർഗ്യൂസൻ, മുഹമ്മദ് ഷമി ബൗളിംഗ് സഖ്യം ഏത് ബാറ്റിംഗ് നിരയ്ക്കും വെല്ലുവിളിയാവും.