ആവേശ പോരാട്ടത്തിൽ സഞ്ജുവിന്റെ രാജസ്ഥാൻ റോയൽസിന് തകർപ്പൻ ജയം

മുംബൈ: ഐപിഎല്ലിൽ സഞ്ജുവിന്റെ രാജസ്ഥാൻ റോയൽസിന് തകർപ്പൻ ജയം. ആവേശം അവസാന ഓവര്‍ വരെ നീണ്ട പോരാട്ടത്തില്‍ ലഖ്‌നൗ സൂപ്പര്‍ ജയന്‍റ്സിനെ മൂന്ന് റണ്‍സിനാണ് രാജസ്ഥാന്‍ തകർത്തത്. രാജസ്ഥാന്‍ ഉയര്‍ത്തിയ 166 റണ്‍സ് വിജയലക്ഷ്യം പിന്തുടര്‍ന്ന ലഖ്നൗവിന് അവസാന ഓവറില്‍ 15 റണ്‍സായിരുന്നു ജയിക്കാന്‍ വേണ്ടിയിരുന്നത്.

അരങ്ങേറ്റക്കാരന്‍ കുല്‍ദീപ് സെന്നിന്‍റെ ആദ്യ പന്തില്‍ ആവേശ് ഖാന്‍ സിംഗിളെടുത്ത് സ്ട്രൈക്ക് മാര്‍ക്ക് സ്റ്റോയ്നിസിന് കൈമാറി. എന്നാല്‍, അതുവരെ തകര്‍ത്തടിച്ച സ്റ്റോയ്നിസിന് രണ്ടാം പന്തിലും മൂന്നാം പന്തിലും നാലാം പന്തിലും റണ്ണെടുക്കാനായില്ല. അഞ്ചാം പന്തില്‍ ബൗണ്ടറിയും ആറാം പന്തില്‍ സിക്സും നേടിയെങ്കിലും മൂന്ന് റണ്‍സിന്‍റെ ആവേശജയവുമായി രാജസ്ഥാന്‍ വീണ്ടും വിജയ വഴിയില്‍ തിരിച്ചെത്തി.

യുസ്‌വേന്ദ്ര ചാഹലിന്‍റെ ബൗളിംഗ് മികവിലാണ് രാജസ്ഥാന്‍ ജയം സ്വന്തമാക്കിയത്. നാല് ഓവറിൽ 41 റൺസ് വിട്ടുകൊടുത്ത് നാല് മുൻനിര വിക്കറ്റുകളാണ് ചാഹൽ നേടിയത്. നേരത്തെ, ടോസ് നഷ്ടപ്പെട്ട് ബാറ്റിംഗിനിറങ്ങിയ രാജസ്ഥാന്റെ തുടക്കം തകർച്ചയോടെയായിരുന്നു. എന്നാൽ, ഷിംറോൺ ഹെറ്റ്മെയറുടെയും ആർ അശ്വിന്റെയും ഇന്നിംഗ്സാണ് പൊരുതാവുന്ന സ്കോർ സമ്മാനിച്ചത്. സ്കോര്‍: രാജസ്ഥാന്‍ റോയല്‍സ് 20 ഓവറില്‍ 165-6, ലഖ്‌നൗ സൂപ്പര്‍ ജയന്‍റ്സ് 20 ഓവറില്‍ 162-8.