താരനും അതുമൂലം ഉണ്ടാകുന്ന ചൊറിച്ചിലും മുടി കൊഴിച്ചിലുമെല്ലാം ഉണ്ടാകാത്തവർ ഇന്ന് വിരളമായിരിക്കുന്നു. താരൻ മാറാൻ പല ശ്രമങ്ങളും നടത്തിയിട്ടും ഫലമൊന്നും കാണാത്തവരും നിരവധിയാണ്. വിട്ടുമാറാത്ത ചൊറിച്ചിലും തലയിലെ ചര്‍മം അടര്‍ന്നു പോകുന്നതുമാണ് പ്രധാന ലക്ഷണങ്ങള്‍. വരണ്ട ചര്‍മവും തലയില്‍ അടിഞ്ഞു കൂടുന്ന പൊടിയും ഫംഗസ് ബാധയുമൊക്കെ താരന്റെ കാരണമായി കണക്കാക്കാറുണ്ട്.
താരന്റെ പ്രശ്നം കൈകാര്യം ചെയ്യേണ്ടി വരുമ്പോൾ ആര്യവേപ്പിലയെ തീർച്ചയായും വിശ്വസിക്കാം. ചൊറിച്ചിൽ, ശിരോചർമ്മത്തിലെ ചുവന്ന പാടുകൾ എന്നിവയിൽ നിന്ന് വേപ്പ് ധാരാളം ആശ്വാസം നൽകുന്നു. ഇതിന് ആൻറി ബാക്ടീരിയൽ, ആന്റിഫംഗൽ ഗുണങ്ങൾ ഉണ്ട്, ഇത് താരൻ വളർച്ചയെ തടയും. കുറച്ച് വേപ്പില എടുത്ത് മിക്സിയിൽ അടിക്കുക. ഒരു ടേബിൾ സ്പൂൺ തേൻ ചേർത്ത് കട്ടിയുള്ള പേസ്റ്റ് ഉണ്ടാക്കുക. തലയിൽ ഈ മാസ്ക് പുരട്ടി 15-20 മിനിറ്റ് നേരം ഇടുക. ശേഷം, തലമുടി തണുത്ത വെള്ളത്തിൽ കഴുകുക. ഇത് തീർച്ചയായും ശിരോചർമ്മം പരിപോഷിപ്പിക്കും.
മുട്ടയുടെ വെള്ള ഹെയര്‍ മാസ്ക് ഉപയോഗിക്കുന്നത് തലയോട്ടിയിലെ അധിക എണ്ണയില്‍ നിന്ന് ശുദ്ധീകരിക്കുകയും മുടിയെ ശക്തിപ്പെടുത്തുകയും വളര്‍ച്ചയെ പ്രോത്സാഹിപ്പിക്കുകയും താരനെതിരെ പോരാടുകയും ചെയ്യുമെന്ന് പഠനങ്ങള്‍ പറയുന്നു. മുട്ടയുടെ വെള്ളയും വെളിച്ചെണ്ണയും ചേര്‍ത്ത് തലയില്‍ തേച്ചിടുക. 15 മിനിറ്റ് കഴിഞ്ഞ് തണുത്ത വെള്ളത്തില്‍ കഴുകി കളയുക.
ഉലുവയില്‍ ഉയര്‍ന്ന പ്രോട്ടീനും നിക്കോട്ടിനിക് ആസിഡും അടങ്ങിയിട്ടുണ്ട്. ഇത് മുടി കൊഴിച്ചില്‍, താരന്‍ എന്നിവ തടയാന്‍ സഹായിക്കുന്നു, കൂടാതെ മുടിയുടെ വരള്‍ച്ച, കഷണ്ടി, മുടി കൊഴിച്ചില്‍ തുടങ്ങിയ പ്രശ്നങ്ങള്‍ക്ക് പരിഹാരം കാണുന്നതിന് സഹായിക്കുന്നു. ഇതില്‍ വലിയ അളവില്‍ ലെസിത്തിന്‍ അടങ്ങിയിട്ടുണ്ട്. ഇത് മുടിക്ക് ജലാംശം നല്‍കുകയും വേരുകളെ ശക്തിപ്പെടുത്തുകയും ചെയ്യുന്നു. കുതിര്‍ത്ത ഉലുവ തലയില്‍ തേച്ചിട്ട ശേഷം ഉണങ്ങി കഴിഞ്ഞ് ഷാംപൂ ഉപയോഗിച്ച്‌ കഴുകി കളയുക. ആഴ്ചയില്‍ രണ്ടോ മൂന്നോ തവണ ഈ പാക്ക് ഇടാം.
കറ്റാര്‍ വാഴയുടെ ആന്റിഫംഗല്‍, ആന്റി ബാക്ടീരിയല്‍ ഗുണങ്ങള്‍ താരനെ തടയുന്നു. മുട്ടയുടെ മഞ്ഞക്കരു കൊഴുപ്പും പ്രോട്ടീനും അടങ്ങിയതിനാല്‍ മുടി കണ്ടീഷനിംഗ് ചെയ്യാന്‍ ഇത് ഉത്തമമാണ്. ഇതിലേക്ക് കറ്റാര്‍വാഴ ജെല്ലും ഒലിവ് ഓയിലും ചേര്‍ത്ത് തലയിലിടുന്നത് താരന്‍ അകറ്റുക മാത്രമല്ല മുടികൊഴിച്ചില്‍ കുറയ്ക്കുകയും ചെയ്യുന്നു.
എല്ലാത്തരം മുടിയിലും പ്രവർത്തിക്കുന്ന ഒരു ഫലപ്രദമായ ഘടകമാണ് തൈര്. ഇതിന് ആൻറി ഇൻഫ്ലമേറ്ററി സവിശേഷതയും ശിരോചർമ്മം തണുപ്പിക്കുന്ന ഗുണങ്ങളുമുണ്ട്. അര കപ്പ് തൈര് എടുത്ത് തൊലി കളഞ്ഞതും നന്നായി അടിച്ചതുമായ പപ്പായയുമായി കലർത്തുക. ഇത് മുടിയിൽ പുരട്ടി 30 മിനിറ്റ് സൂക്ഷിക്കുക, അതിനുശേഷം പതിവുപോലെ മുടി കഴുകുക. ഇത് താരൻ നിയന്ത്രണത്തിലാക്കാൻ സഹായിക്കുന്നതോടൊപ്പം ശിരോചർമ്മം ശുദ്ധീകരിക്കാനും മുടിയുടെ വളർച്ചയ്ക്കും സഹായിക്കുന്നു.
Post Your Comments