തിരുവനന്തപുരം: മുൻ ഡിജിപി ആർ. ശ്രീലേഖയ്ക്ക് എതിരെ എതിർപ്പുമായി പൊലീസ് ഓഫീസേഴ്സ് അസോസിയേഷൻ രംഗത്തെത്തി. സേനയിൽ പ്രവർത്തിക്കുന്ന സ്ത്രീകളുടെ മനോവീര്യം കെടുത്താനും, കുടുംബത്തിൽ അസ്വസ്ഥത വളർത്താനും മുന്‍ ഡിജിപി ശ്രമിക്കുകയാണെന്ന് സംഘടനാ ജനറല്‍ സെക്രട്ടറി സി.ആര്‍ ബിജു ഫേസ്‌ബുക്കിൽ കുറിച്ചു. അടുത്തിടെ ഒരു അഭിമുഖത്തില്‍ മുൻ ഡിജിപി നടത്തിയ പരാമർശങ്ങൾക്ക് എതിരെയാണ് സംഘടനാ ജനറല്‍ സെക്രട്ടറി കുറിപ്പ് പങ്കുവെച്ചത്.
സേനയിൽ ലൈംഗിക ചൂഷണം നടക്കുന്നതായി ആര്‍. ശ്രീലേഖ അഭിമുഖത്തിൽ പരാമർശിച്ചിരുന്നു. വനിതാ എസ്ഐയോട് ഡിഐജി മോശമായി പെരുമാറിയതായി ആര്‍. ശ്രീലേഖ അഭിമുഖത്തില്‍ പറഞ്ഞിരുന്നു. ആ സംഭവത്തിൽ മുൻ ഡിജിപി എന്ത് നടപടിയാണ് സ്വീകരിച്ചതെന്ന് സംഘടനാ ജനറല്‍ സെക്രട്ടറി പോസ്റ്റില്‍ ചോദിച്ചു. ‘ഡിഐജിയുടെ പേര് അവർ വെളിപ്പെടുത്താതിരുന്നതിനാൽ മുതിർന്ന ഐപിഎസുകാരിൽ പലരും ഇപ്പോൾ സംശയത്തിന്‍റെ നിഴലിലാണ്. മുൻ ഡിജിപിയുടെ പരാമർശം പൊലീസിലെ സഹോദരിമാരുടെ ജീവിതം തകർക്കുകയാണ്. സർവീസിൽ ഇരിക്കവേ നടപടികൾ എടുക്കാതെ വിരമിച്ച ശേഷം ആർ. ശ്രീലേഖ അതിരുകടന്ന ആരോപണങ്ങൾ ഉയർത്തരുത്’ സംഘടനാ ജനറല്‍ സെക്രട്ടറി കുറിപ്പിൽ പറയുന്നു. കേരളത്തിലെ പൊലീസ് സേനാംഗങ്ങൾ ഒന്നാകെ ബഹുമാനിക്കുന്ന വനിതാ ഉദ്യോഗസ്ഥയാണ് ഐപിഎസ് അസോസിയേഷൻ സെക്രട്ടറി ഹർഷിത അത്തല്ലൂരി എന്നും അദ്ദേഹം പറഞ്ഞു.
കുറിപ്പിന്റെ പൂർണരൂപം ഇങ്ങനെ:
‘ചില കാര്യങ്ങൾ മാത്രം നേരെ ചൊവ്വേ പറഞ്ഞു കൊള്ളട്ടെ..
ഒരു ചാനലിൽ മുൻ ഐപിഎസ് ഓഫീസർ ശ്രീമതി ആർ. ശ്രീലേഖയുമായിട്ടുളള ഇന്റർവ്യൂ കണ്ടു. അഭിപ്രായ സ്വാതന്ത്ര്യം എല്ലാവർക്കും ഉള്ളതുപോലെ തന്നെ അത്തരം അഭിപ്രായങ്ങളിൽ വിയോജിപ്പുകൾ രേഖപ്പെടുത്താനും എല്ലാവർക്കും അവകാശവുമുണ്ട്.
പ്രസ്തുത ഇൻ്റർവ്യൂവിൽ ശ്രീമതി ആർ. ശ്രീലേഖ എന്ന ബഹുമാന്യയായ മുൻ ഐപിഎസ് ഉദ്യോഗസ്ഥയുടെ അഭിപ്രായങ്ങളിൽ സ്വന്തം ദുർബലതകൾ നിറഞ്ഞു നിന്നതായാണ് കാണാൻ കഴിഞ്ഞത്. അത് അവരുടെ വ്യക്തിപരമായ രീതികളാകാം. എന്നാൽ അതിനിടയിൽ നടത്തിയ ചില പരാമർശങ്ങൾ കേട്ടില്ല, കണ്ടില്ല എന്ന് നടിക്കുവാൻ കഴിയില്ല എന്നതുകൊണ്ടു തന്നെ, ചില കാര്യങ്ങൾ മാത്രം നേരെ ചൊവ്വേ പറയാൻ ആഗ്രഹിക്കുന്നു.
ഒരു വനിതാ എസ്ഐയോട് ഒരു ഡിഐജി മോശമായി പെരുമാറി എന്ന് മാഡം പറയുന്നത് കേട്ടു. ഒരു ഡിഐജി അത്തരത്തിൽ തൻ്റെ സബോർഡിനേറ്റിനോട് മോശമായി പെരുമാറി എന്ന കാര്യം അറിഞ്ഞിട്ട്, അതിൽ എന്ത് നടപടി മാഡം സ്വീകരിച്ചത് എന്നത് ഒരു ചോദ്യചിഹ്നമായി അവശേഷിക്കുന്നു. അത്തരത്തിൽ ഒരു സംഭവം നടന്നിട്ടുണ്ടെങ്കിൽ തന്നെ, അത് 1990 കളുടെ ആദ്യം നടന്നതാണ് എന്നാണ് സംസാരത്തിലൂടെ നമുക്ക് ബോധ്യമാകുന്നത്. മാത്രമല്ല, ഈ പറഞ്ഞ കാര്യത്തിൽ എന്തെങ്കിലും അടിസ്ഥാനമുണ്ടെങ്കിൽ, അത് മറച്ചുവച്ച് കുറ്റവാളിയെ സംരക്ഷിച്ചതിലൂടെ തീർത്തും നിരുത്തരവാദിത്വപരമായ സർവ്വീസ് ജീവിതമായിരുന്നു തന്റേതെന്ന് മാഡം സ്വയം വിളിച്ചു പറയുകയായിരുന്നില്ലേ…
ജോലികളുടെ ഭാഗമായി രാവെന്നോ പകലെന്നോ വ്യത്യാസമില്ലാതെ എല്ലാവരും തൊഴിലെടുക്കുന്ന സാഹചര്യമാണ് പൊലീസിലുള്ളത്. വനിതകളുടെ സാന്നിധ്യം അനിവാര്യമായ സന്ദർഭങ്ങളിൽ ജോലിക്കായി അർദ്ധരാത്രികളിൽ പോലും വനിതാ പൊലീസ് ഉദ്യോഗസ്ഥരെ സ്റ്റേഷനുകളിലേക്ക് വിളിപ്പിക്കേണ്ടി വരുന്ന സാഹചര്യം ചിലയിടത്തെങ്കിലും ഇന്നും നിലനിൽക്കുന്നുണ്ട്. അതുപോലെ ഡ്യൂട്ടി കഴിഞ്ഞ് അർദ്ധരാത്രികളിൽ തിരിച്ച് വീട്ടിലേക്ക് പോകേണ്ട സാഹചര്യവും അവർക്ക് ഉണ്ടാകുന്നുണ്ട്. പൊതുസമൂഹത്തിനായി അത്രയേറെ കഷ്ടപ്പെടുന്ന തൊഴിൽ മേഖലയാണ് പൊലീസ് എന്ന ബോധം പോലും ഇല്ലാതെയാണ്, ഇങ്ങനെ ഒരു പരാമർശം പൊലീസിൻ്റെ ഉന്നത സ്ഥാനത്ത് ഉണ്ടായിരുന്ന മാഡത്തിൽ നിന്നും ഉണ്ടായത്. ഇത്തരം ജല്പനങ്ങളിലൂടെ വനിതാ പൊലീസ് ഉദ്യോഗസ്ഥരുടെ കുടുംബങ്ങളിൽ അസ്വാരസ്യങ്ങൾ ഉണ്ടാകാം എന്ന സാധ്യത മാഡം ഓർക്കേണ്ടതായിരുന്നു. അഥവാ ഇങ്ങനെ ആരെങ്കിലും പെരുമാറുന്ന സഹചര്യം ഉണ്ടായാൽ, അതിനെ സധൈര്യം നേരിടാൻ തന്റേടമുള്ളവരാണ് കേരള പൊലീസിലെ വനിതാ ഉദ്യോഗസ്ഥർ എന്ന് അഭിമാനത്തോടെ പറയാനും ആഗ്രഹിക്കുന്നു.
അതുപോലെ, ഇങ്ങനെ പെരുമാറിയ ഡിഐജിയുടെ പേര് വെളിപ്പെടുത്താത്തതിലൂടെ ശ്രീമതി ആർ. ശ്രീലേഖ അവർകൾ സർവീസിൽ കയറിയ അന്ന് മുതൽ വിരമിക്കുന്നതുവരെ സർവ്വീസിൽ ഉണ്ടായിരുന്ന മുഴുവൻ ഐപിഎസ് ഉദ്യോഗസ്ഥന്മാരെയും അപകീർത്തിപ്പെടുത്തിയെന്നും പറയാതിരിക്കാൻ കഴിയില്ല..
ലോകമെങ്ങും സേനാ വിഭാഗങ്ങൾ പുരുഷാധിപത്യത്തിന്റെ കേന്ദ്രങ്ങൾ ആയിരുന്നു. അതിൽ മാറ്റം വന്ന് തുടങ്ങിയിട്ട് അധികകാലമായിട്ടില്ല. ആ മാറ്റം പൂർണ്ണവുമായിട്ടില്ല. കേരളത്തിൽ ആദ്യ കാലത്ത് പൊലീസിന്റെ താഴെത്തട്ടിൽ മാത്രമായിരുന്നു വനിതകൾ ഉണ്ടായിരുന്നത്. കേരളപ്പിറവിക്ക് ശേഷമാണ് പൊലീസ് സേനയിൽ വനിതാ സാന്നിധ്യം കൂടി വന്നത്. അതിൽ ഐപിഎസ് തലത്തിൽ കേരളത്തിൽ ആദ്യമായി വന്ന വനിതാ ഉദ്യോഗസ്ഥ തന്നെയാണ് ആർ. ശ്രീലേഖ; ആദ്യമായി വിരമിച്ച വനിതാ ഐപിഎസ് ഉദ്യോഗസ്ഥയും. അവർ തന്നെ വിരമിച്ച ശേഷം കേരള പൊലീസിലെ മുഴുവൻ സഹോദരിമാരുടേയും ജീവിതത്തെ സംശയ നിഴലിൽ നിർത്തുന്ന തരത്തിലുള്ള ചില പരാമർശങ്ങൾ ഇന്റർവ്യൂവിലൂടെ നടത്തിയത് അതിരുകടന്നു പോയി എന്ന് വേദനയോടെ പറയട്ടെ. നിലവിൽ കേരളത്തിലെ ഐപിഎസ് ഉദ്യോഗസ്ഥരിൽ നിരവധി വനിതകളുമുണ്ട്. ഐപിഎസ് അസോസിയേഷന്റെ സെക്രട്ടറി പദത്തിലുള്ളത് ശ്രീമതി ഹർഷിത അട്ടല്ലൂരി ഐപിഎസ് അവർകളാണ്. കേരളത്തിൽ റാങ്ക് വ്യത്യാസം ഇല്ലാതെ നൂറ് ശതമാനം ജീവനക്കാരും പൂർണ്ണമായും ബഹുമാനിക്കുകയും സ്നേഹിക്കുകയും ചെയ്യുന്ന വ്യക്തിത്വം കൂടിയാണ് ശ്രീമതി ഹർഷിത അട്ടല്ലൂരി ഐപിഎസ് എന്ന് അഭിമാനത്തോടെ പറയാൻ ആഗ്രഹിക്കുന്നു.
കേരളത്തിലെ വനിതാ ഐപിഎസ് ഉദ്യോഗസ്ഥരെല്ലാം തന്നെ മികവോടെ പ്രവർത്തിക്കുന്ന, എല്ലാവരും അംഗീകരിക്കുന്നവർ തന്നെയാണ് എന്ന കാര്യത്തിലും സേനാംഗങ്ങൾക്ക് സംശയമില്ല. ലിംഗ വ്യത്യാസമില്ലാതെ സബ് ഇൻസ്പക്ടർ നിയമനം പോലും ആരംഭിച്ച നാടാണ് കേരളം. സിവിൽ പൊലീസ് ഓഫീസർ വിഭാഗത്തിലും ലിംഗ വ്യത്യാസമില്ലാതെ നിയമനം നടത്തണം എന്ന ആവശ്യം മുന്നോട്ട് വയ്ക്കുന്ന പൊലീസ് സംഘടനകൾ ഉള്ള നാടാണ് കേരളം. ഈ നാട്ടിലാണ് പൊലീസ് വകുപ്പിലെ വനിതകൾ പീഡനങ്ങൾക്ക് വിധേയരാകുന്നു എന്ന ഒരടിസ്ഥാനവുമില്ലാത്ത ആരോപണങ്ങൾ ഒരു ചാനൽ ചർച്ചയിലൂടെ സ്വയം വിളിച്ചു പറഞ്ഞ് ഡിജിപി സ്ഥാനത്തിരുന്ന് വിരമിച്ച ഒരാൾ സ്വയം അപഹാസ്യയാകുന്നത്.
അതുപോലെ തന്നെ, പൊലീസ് അസോസിയേഷനുകളേയും അവർ ഒരു അടിസ്ഥാനവുമില്ലാതെ ആക്ഷേപിക്കുന്നത് കേട്ടു. ഒരു കാര്യം വ്യക്തമാക്കാൻ ആഗ്രഹിക്കുന്നു. 1979 മുതൽ കേരളത്തിൽ പൊലീസ് അസോസിയേഷനുകൾ പ്രവർത്തിച്ചു വരുന്നുണ്ട്. ജീവനക്കാരുടെ ആവശ്യങ്ങളും, അവകാശങ്ങളും നേടിയെടുക്കുന്നതിനുള്ള പ്രവർത്തനങ്ങൾക്കൊപ്പം അവരുടെ ആത്മാഭിമാനം സംരക്ഷിക്കാനും, മാന്യമായ തൊഴിൽ സാഹചര്യം സൃഷ്ടിക്കാനും സംഘടനകൾ മുൻകൈ എടുത്ത് പ്രവർത്തിക്കുന്നുണ്ട്. 2005 ൽ എംജി കോളേജിൽ ഔദ്യോഗിക കൃത്യനിർവഹണത്തിൽ ഏർപ്പെട്ട ഒരു പൊലീസ് ഉദ്യോഗസ്ഥനെ കയ്യേറ്റം ചെയ്ത ഉന്നത ഉദ്യോഗസ്ഥന്റെ നടപടിക്കെതിരെയും, 2017 ൽ ഗവാസ്കർ എന്ന പൊലീസ് ഡ്രൈവറെ ഒരു ഉന്നത ഉദ്യോഗസ്ഥന്റെ മകൾ കൈയ്യേറ്റം ചെയ്തപ്പോൾ അതിനെതിരേയും സംഘടനകൾ കൈക്കൊണ്ട നിലപാട് പൊതുസമൂഹത്തിന് അറിയാവുന്നതാണല്ലോ… ഇത്തരത്തിൽ നിലപാടുകൾ എടുക്കുന്ന പൊലീസ് സംഘടനകൾ ഉള്ള കേരളത്തിൽ ഒരു വനിതാ ഉദ്യോഗസ്ഥയെ മേൽഉദ്യോഗസ്ഥൻ പീഡിപ്പിക്കാൻ ശ്രമിക്കുന്ന സാഹചര്യം ഉണ്ടായതായി അറിവായാൽ ഏത് തരത്തിലായിരിക്കും സംഘടനകൾ പ്രതികരിക്കുക എന്ന് ചിന്തിച്ചു നോക്കിയാൽ നന്നായിരിക്കും എന്ന് മാത്രമേ പറയാൻ ആഗ്രഹിക്കുന്നുള്ളൂ..
സർവ്വീസിൽ ഇരിക്കെ ചെയ്യാൻ കഴിയുന്നത് ആത്മാർത്ഥമായി ചെയ്യുക. സർവ്വീസിൽ വിരാജിച്ച്, ഒന്നും ചെയ്യാൻ കഴിയാതെ വിരമിച്ച ശേഷം പൊലീസ് സംവിധാനത്തെ ആകെ തകർക്കുക എന്ന രീതിയിലേക്ക് തരം താഴാതിരിക്കുക. ഇത് മാത്രമാണ് ഈ ഇൻ്റർവ്യൂവിന് മറുപടിയായി കേരളത്തിലെ പൊലീസ് സമൂഹത്തിന് ബഹുമാനപ്പെട്ട മുൻ ഡിജിപിയോട് പറയാനുള്ളത്.’
Post Your Comments