തിരുവനന്തപുരം: വാലന്റൈൻസ് ദിനം പ്രമാണിച്ച്‌ യാത്രക്കാർക്കായി സെൽഫി കോൺടെസ്റ്റ് സംഘടിപ്പിക്കാൻ ഒരുങ്ങി കെഎസ്ആർടിസി. തിരുവനന്തപുരം നഗരത്തിൽ കെഎസ്ആർടിസി ആരംഭിച്ച പുതുപുത്തൻ സംരംഭമായ സിറ്റി സർക്കുലർ സർവീസുകളിൽ യാത്ര ചെയ്തുകൊണ്ട് കെഎസ്ആർടിസിയോട് പ്രണയം വെളിവാക്കുന്ന രീതിയിൽ സെൽഫി എടുത്ത് ഭാഗ്യം പരീക്ഷിക്കാൻ താത്പര്യമുള്ളവർ അയച്ചു നൽകാനാണ് കെഎസ്ആർടിസി ആവശ്യപ്പെടുന്നത്.
തിരുവനന്തപുരം നഗരത്തിലെ സിറ്റി സർക്കുലർ ബസുകൾ നിലവിൽ സർവീസ് നടത്തി വരുന്ന ഏഴ് റൂട്ടുകളിൽ നിന്നും തിരഞ്ഞെടുക്കപ്പെടുന്ന മൂന്ന് യാത്രക്കാർ വീതം, ആകെ 21 പേരാണ് ഈ സെൽഫി കോൺടെസ്റ്റിൽ ആകർഷണീയമായ സമ്മാനങ്ങൾക്ക് അർഹരാവുക. വർഷങ്ങൾ പിന്നിടുമ്പോഴും അനശ്വരമായ പ്രണയം മനസ്സിൽ സൂക്ഷിക്കുന്ന ദമ്പതിമാർക്കും ഈ മത്സരത്തിൽ ഒരുമിച്ച്‌ പങ്കെടുക്കാൻ അവസരം ലഭിക്കും.
മത്സരത്തിൽ പങ്കെടുക്കാൻ താത്പര്യപ്പെടുന്നവർ അവർ പകർത്തിയ മനോഹര ചിത്രങ്ങളോടൊപ്പം യാത്രക്കാരന്റെ പേര്, ഫോൺ നമ്പർ, മേൽവിലാസം, സഞ്ചരിച്ച സിറ്റി സർക്കിളിന്റെ പേര് എന്നിവ കെഎസ്‌ആർടിസിയുടെ 24 x 7 സോഷ്യൽ മീഡിയ സെല്ലിന്റെ 8129562972 എന്ന വാട്സാപ്പ് നമ്പറിൽ അയയ്ക്കാൻ കെഎസ്ആർടിസി നിർദ്ദേശിച്ചു.
Post Your Comments