നെടുമങ്ങാട് : സ്പോക്കൺ ഇംഗ്ലിഷ് പഠിക്കാൻ എത്തിയ പത്തൊമ്പതുകാരിയെ ലൈംഗികമായി പീഡിപ്പിക്കാൻ ശ്രമിച്ച ട്യൂഷൻ സെന്‍റർ ഉടമ പിടിയിൽ. അരുവിക്കര സ്വദേശി മോഹൻ സരൂപി(58)നെയാണ് പോലീസ് അറസ്റ്റ് ചെയ്തത്. പലയിടങ്ങളിലായി കഴിഞ്ഞ ഒക്‌ടോബറിലാണ് ഇയാൾ സ്പോക്കൺ ഇംഗ്ലീഷ് ട്യൂഷൻ സെന്‍റർ ആരംഭിച്ചത്. പഠിക്കാനെത്തുന്ന വിദ്യാർഥിനികളെ പീഡിപ്പിക്കുകയും പെൺകുട്ടികളുടെ ദൃശ്യങ്ങൾ മൊബൈൽ ഫോണിൽ പകർത്തുകയും ചെയ്യുന്നതാണ് ഇയാളുടെ രീതി എന്ന് പോലീസ് അറിയിച്ചു.
കഴിഞ്ഞ ദിവസം മറ്റ് വിദ്യാർഥികൾ ഇല്ലാത്ത സമയത്ത് ക്ലാസ് എടുക്കാനെന്ന വ്യാജേന ഇയാൾ പെൺകുട്ടിയെ സെന്‍ററിൽ വിളിച്ചു വരുത്തുകയായിരുന്നു. തുടർന്ന് ഇയാൾ പെൺകുട്ടിയെ പീഡിപ്പിക്കാൻ ശ്രമിക്കുകയായിരുന്നു. അവിടെ നിന്നും രക്ഷപ്പെട്ട പെൺകുട്ടി അരുവിക്കര പോലീസിൽ പരാതി നൽകുകയായിരുന്നു.
പെൺകുട്ടിയുടെ പരാതിയെ തുടർന്ന് ഇയാളെ പോലീസ് അറസ്റ്റ് ചെയ്യുകയായിരുന്നു. സ്ത്രീകളോട് അപമര്യാദയായി പെരുമാറിയതിന് നേരത്തെ ഇയാളുടെ ഉടമസ്ഥതയിലുള്ള കണ്ണട കടയിൽ വച്ച് നാട്ടുകാർ ഇയാൾക്ക് താക്കീത് നൽകിയിരുന്നു. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
Post Your Comments