കോട്ടയം: മെഡിക്കല്‍ കോളജ് അര്‍ബുദ വാര്‍ഡിന്റെ മുന്നില്‍ നിന്ന് ഓട്ടോ മോഷ്ടിച്ച സംഭവത്തില്‍ മൂന്നുപേര്‍ അറസ്റ്റില്‍. മൂവാറ്റുപുഴ പേഴക്കാപ്പള്ളി സ്വദേശിയും നിരവധി മോഷണക്കേസില്‍ പ്രതിയുമായ കഴപ്പുരക്കല്‍ വീട്ടില്‍ കെ.കെ. ഷാജി (43), മുളവൂര്‍ മുങ്ങച്ചാല്‍ സ്കൂളുംപടി ഭാഗത്ത് സജീവ്, വാളകം സി.ടി.സി ഭാഗത്ത് തേവര്‍മഠത്തില്‍ ടി.എസ്. അനില്‍ എന്നിവരെയാണ് പൊലീസ് പിടികൂടിയത്.
രണ്ടാഴ്ച മുമ്പാണ് കേസിനാസ്പദമായ സംഭവം. മാതാവിന് അര്‍ബുദചികിത്സയുമായി ബന്ധപ്പെട്ട് എത്തിയ തിടനാട് ചേറ്റുതോട് സ്വദേശിയായ നാരായണന്റെ ഓട്ടോയാണ് മോഷണം പോയത്.
ജില്ല പൊലീസ് മേധാവിക്ക് ലഭിച്ച രഹസ്യവിവരത്തെ തുടര്‍ന്ന് കോട്ടയം ഡിവൈ.എസ്.പിയുടെ നിര്‍ദേശപ്രകാരം ഗാന്ധിനഗര്‍ സി.ഐ കെ. ഷിജി, എസ്.ഐ കെ.കെ. പ്രശോഭ്, സി.പി.ഒമാരായ രാഗേഷ്, പ്രവിനോ, വിജയന്‍, പ്രവീണ്‍ നായര്‍ എന്നിവരാണ് പ്രതികളെ പിടികൂടിയത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.
Post Your Comments