‘മത്തായിച്ചാ മുണ്ട് മുണ്ട്’ മുണ്ടഴിഞ്ഞുപോയിട്ടും പ്രസംഗം നിർത്താതെ സിദ്ധരാമയ്യ: ചെവിയിൽ പറഞ്ഞ് ‍ഡികെ, കൂട്ടച്ചിരി

ബെംഗളൂരു: നിയമസഭയിൽ പ്രസംഗിച്ചു കൊണ്ടിരിക്കെ മുൻ കർണാടക മുഖ്യമന്ത്രിയും പ്രതിപക്ഷ നേതാവുമായ സിദ്ധരാമയ്യയ്ക്ക് മാന്നാർ മത്തായി സ്പീക്കിങ്ങിലെ ഇന്നസെന്റിന്റെ കഥാപാത്രത്തിനുണ്ടായ അനുഭവം നേരിടേണ്ടി വന്നു. സിദ്ധരാമയ്യയുടെ മുണ്ട് അഴിഞ്ഞു വീണിട്ടും അദ്ദേഹം ഇക്കാര്യം അറിയാതെ പ്രസംഗം തുടരുകയായിരുന്നു. തുടർന്നു പിൻസീറ്റിൽ ഇരിക്കുകയായിരുന്ന സംസ്ഥാന കോൺഗ്രസ് അധ്യക്ഷൻ ഡി.കെ.ശിവകുമാർ സിദ്ധരാമയ്യയുടെ അടുത്തെത്തി ചെവിയിൽ രഹസ്യമായി കാര്യം അവതരിപ്പിച്ചു.

‘ ഓ..ഓക്കേ ‘ എന്ന് പറഞ്ഞ് അദ്ദേഹം താഴെക്കിടന്ന മുണ്ടെടുത്ത് ഉടുത്തു, പ്രസംഗം തുടർന്നു. ഈ സംഭവത്തിന്റെ വീഡിയോ സമൂഹമാധ്യമത്തിൽ വൈറലാവുകയാണ്.മൈസൂർ കൂട്ട ബലാത്സംഗത്തിൽ പൊലീസ് നടപടികളെക്കുറിച്ചു സംസാരിക്കുന്നതിനിടെയായിരുന്നു സംഭവം. കോവിഡാനന്തരം 4–5 കിലോ ശരീരഭാരം കൂടി, വയറുചാടി. അതുകൊണ്ടാണ് മുണ്ടഴിഞ്ഞുപോയതെന്ന് സിദ്ധരാമയ്യ സഭയിൽ പറഞ്ഞു. ഇതു കേട്ട് സ്പീക്കർ അടക്കമുള്ളവർക്ക് ചിരിയടക്കാനായില്ല.

അതേസമയം, ശിവകുമാർ ചെവിയിൽ പറഞ്ഞ കാര്യം പരസ്യപ്പെടുത്തിയത് കോൺഗ്രസിൽ നീരസമുണ്ടാക്കിയിട്ടുണ്ട്. പാർട്ടിയുടെ മുഖം രക്ഷിക്കാനാണ് ശിവകുമാർ ചെവിയിൽ കാര്യം പറഞ്ഞത്. എന്നാൽ സിദ്ധരാമയ്യ നിയമസഭയിൽ എല്ലാവരും കേൾക്കെ പറഞ്ഞു. ഇതിലൂടെ പാർട്ടിയെ ആക്രമിക്കാൻ ബിജെപിക്കു അവസരം ഒരുക്കിയെന്നും കോണ്‍ഗ്രസ് എംഎൽഎ രമേഷ് കുമാർ പറഞ്ഞു.