തിരുവനന്തപുരം: തമ്പാനൂർ റോഡില്‍ പാര്‍ക്ക് ചെയ്തിരുന്ന ഓട്ടോയുമായി കടന്നു കളഞ്ഞ മെക്കാനിക് അറസ്റ്റിൽ. കൊട്ടാരക്കര വെട്ടിക്കവല കണ്ണംകോട് സ്വദേശി രമേശ് (47) ആണ് കന്‍റോണ്‍മെന്റ് പോലീസിന്റെ പിടിയിലായത്. കഴിഞ്ഞമാസം 27ന് തമ്പാനൂര്‍ രാജാജി നഗറില്‍ ശാലുവിന്‍റെ ഓട്ടോറിക്ഷയാണ് ഇയാള്‍ മോഷ്ടിച്ചത്.
തമ്പാനൂർ റോഡിൽ കഴിഞ്ഞ മാസം പാര്‍ക്ക് ചെയ്തിരുന്ന ശാലുവിന്‍റെ ഓട്ടോ തട്ടിയെടുത്ത് കൊട്ടാരക്കരയിലേക്ക് രമേശന്‍ പോകുകയായിരുന്നു. എന്നാല്‍ ഓട്ടോയുടെ ഉടമസ്ഥനായ ശാലു മോഷണ വിവരം അറിയാന്‍ വൈകി. സിസി അടക്കാത്തനിനാല്‍ ബാങ്ക് അധികൃതര്‍ വാഹനം കൊണ്ട് പോയെന്നായിരുന്നു ശാലു ആദ്യം കരുതിയത്. ബാങ്കുമായി ബന്ധപ്പെട്ടപ്പോഴാണ് സത്യം വെളിയില്‍ വന്നത്. തുടര്‍ന്ന് പോലീസിൽ പരാതി നൽകുകയായിരുന്നു.
പിടിയിലായ പ്രതി രമേശന്‍ നേരത്തെ കരമന ഭാഗത്ത് വാടകക്ക് താമസിച്ചിരുന്നു. മെക്കാനിക്കായ ഇയാള്‍ അപകടത്തില്‍പെടുന്നതും തകരാറ് സംഭവിച്ചതുമായ ഓട്ടോകള്‍ കുറഞ്ഞവിലക്കെടുത്ത് അറ്റകുറ്റപ്പണി പൂര്‍ത്തിയാക്കി നല്‍കുമായിരുന്നു. ഇതിനിടയിലാണ് ഈ സംഭവം അരങ്ങേറുന്നത്. രമേശനെതിരെ മറ്റെന്തെങ്കിലും കേസുകൾ ഉണ്ടോയെന്നും പോലീസ് അന്വേഷിക്കുന്നുണ്ട്.
Post Your Comments