ഡൽഹി: രാജ്യത്തിനായി ഒളിമ്പിക് സ്വര്‍ണ്ണം നേടിയ നീരജ് ചോപ്രക്ക് സമ്മാനം പ്രഖ്യാപിച്ച്‌ ആനന്ദ് മഹീന്ദ്ര. പുറത്തിറങ്ങാനിരിക്കുന്ന എക്സ്യുവി 700 ആണ് ചോപ്രക്ക് നല്‍കുക. ജാവലിന്‍ താരത്തിന് സമ്മാനം നൽകുന്ന വിവരം ട്വിറ്ററിലൂടെയാണ് അദ്ദേഹം പ്രഖ്യാപിച്ചത്. ഒളിംപിക്സിൽ വ്യക്തിഗത ഇനത്തിൽ 2008ല്‍ ഷൂട്ടിങ്ങില്‍ അഭിനവ് ബിന്ദ്ര സ്വര്‍ണം നേടിയതിന് 13 വർഷങ്ങൾക്ക് ശേഷമാണ് ടോക്യോ ഒളിമ്പിക്സിൽ ജാവലിന്‍ ത്രോയില്‍ നീരജ് ചോപ്ര സ്വര്‍ണം നേടിയത്.
87.58 മീറ്റര്‍ എന്ന ദൂരത്തേക്ക് ജാവലിന്‍ എറിഞ്ഞാണ് നീരജിന്‍റെ മെഡല്‍ നേട്ടം. ആദ്യ ശ്രമത്തില്‍ 87.03 ദൂരം കണ്ടെത്തിയ നീരജ് രണ്ടാം ശ്രമത്തില്‍ ദൂരം മെച്ചപ്പെടുത്തി. പിന്നീടുള്ള ശ്രമങ്ങളില്‍ 87.58 മീറ്റര്‍ എന്ന ദൂരം മറികടക്കാന്‍ കഴിഞ്ഞില്ലെങ്കിലും ഇന്ത്യക്കായി ചരിത്ര മെഡല്‍ നേടാൻ നീരജിന് കഴിഞ്ഞു.
ചരിത്ര നേട്ടം: നീരജ് ചോപ്രയ്ക്ക് അഭിനന്ദനങ്ങളുമായി രാഷ്ട്രപതി
നീരജിന് സമ്മാനമായി നൽകുന്ന മഹീന്ദ്രയുടെ ഏറ്റവും പുതിയ എക്സ്.യു.വി 700 വരും ആഴ്ച്ചകളില്‍ പുറത്തിറക്കാനാണ് കമ്പനി തീരുമാനിച്ചിരിക്കുന്നത്. 14 ലക്ഷം മുതല്‍ 22 ലക്ഷം വരെയായിരിക്കും വാഹനത്തിന്റെ വില. ഡ്യുവല്‍-ടോണ്‍ ഇന്‍റീരിയര്‍, അലക്‌സ ഓണ്‍ ബോര്‍ഡ്, സോണി 3 ഡി സൗണ്ട് സിസ്റ്റവുമായി ബന്ധിപ്പിച്ച അഡ്രിനോക്സ് ഫീച്ചര്‍, പുഷ്-ബട്ടണ്‍ സ്റ്റാര്‍ട്ട്, പുതിയ മള്‍ട്ടി-ഫങ്ഷണല്‍ സ്റ്റിയറിംഗ് വീല്‍, റോട്ടറി ഡയലുകള്‍, കൂള്‍ഡ് ഗ്ലവ്ബോക്സ് തുടങ്ങി ഏറ്റവും ആധുനികമായ സൗകര്യങ്ങൾ വാഹനത്തിലുണ്ട്.
Post Your Comments