ഭാര്യയെയും മക്കളെയും വിഷം കുത്തിവച്ച് കൊലപ്പെടുത്തിയ യുവാവ് പിടിയിൽ

കുണ്ടറ; കേരളപുരത്ത് ഭാര്യയെയും രണ്ടു മക്കളെയും വിഷം കുത്തിവച്ച് കൊലപ്പെടുത്തിയ യുവാവിനെ പൊലീസ് അറസ്റ്റ് ചെയ്തിരിക്കുന്നു. മുക്കടയിലെ സ്വകാര്യ മെഡിക്കൽ സ്റ്റോർ ജീവനക്കാരൻ മൺറോത്തുരുത്ത് പെരുങ്ങാലം എറോപ്പിൽ വീട്ടിൽ വൈ.എഡ്വേർഡിനെ (അജിത്ത് 40) നെയാണ് പോലീസ് അറസ്റ്റ് ചെയ്തിരിക്കുന്നത്. പ്രതിയെ കോടതിയിൽ ഹാജരാക്കി റിമാൻഡു ചെയ്തു.

ഭാര്യ വർഷ (26), ഇളയ മക്കളായ അലൈൻ (രണ്ട്), ആരവ് (മൂന്നു മാസം) എന്നിവരെയാണ് വിഷം കുത്തിവച്ചു കൊലപ്പെടുത്തിയിരിക്കുന്നത്. സംഭവസമയത്ത് മൂത്ത മകൾ അതേ വീട്ടിൽ മറ്റൊരു മുറിയിലായിരുന്നു ഉണ്ടായിരുന്നത്. കഴിഞ്ഞ 11 ന് വൈകിട്ടായിരുന്നു ഞെട്ടിക്കുന്ന ദാരുണ സംഭവം. ഭാര്യയെ സംശയിച്ചുള്ള കുടുംബ വഴക്കാണ് കാരണമെന്ന് പറയുന്നു. ഇവർ കേരളപുരത്തെ വാടക വീട്ടിലായിരുന്നു താമസം.