കോവിഡ് വൈറസ്; ഇന്ത്യൻ വകഭേദത്തിന്റെ അപകട സാധ്യത കുറച്ചുകാണരുതെന്ന്​ ഫ്രാൻസ്​ ആരോഗ്യമന്ത്രി

പാരിസ്​: കോവിഡ് വൈറസിന്റെ ഇന്ത്യൻ വകഭേദം അപകടമേറിയതാണെന്നും അതിന്റെ അപകട സാധ്യതയെ വിലകുറച്ച് കാണരുതെന്നും​ ഫ്രാൻസിലെ ആരോഗ്യമന്ത്രി ഒളിവിയർ വെരാൻ. നിലവിലുള്ള കോവിഡ്​ വാക്​സിനുകൾ ഇന്ത്യൻ വകഭേദത്തിനെതിരെ ഫലപ്രദമാണോ എന്ന കാര്യത്തിൽ വ്യക്തതയില്ലെന്നും അദ്ദേഹം പറഞ്ഞു.

ഫ്രാൻസിൽ കൊറോണ വൈറസിന്റെ ബി.1.617 ഇന്ത്യൻ വകഭേദം മൂന്നുപേർക്ക്​ സ്ഥിരീകരിച്ചതായും റിപ്പോർട്ടുകളുണ്ട്​. ഇന്ത്യയിൽനിന്ന് തിരിച്ചെത്തിയ ഒരു സ്ത്രീക്കും തെക്കുകിഴക്കൻ ഫ്രാൻസിലെ മറ്റ് രണ്ട് പേർക്കും രോഗം ബാധിച്ചതായി ആരോഗ്യ മന്ത്രാലയം വ്യക്​തമാക്കി.

ലോകാരോഗ്യ സംഘടനയുടെ കണക്ക് പ്രകാരം ഇന്ത്യൻ വകഭേദം നിലവിൽ 17 രാജ്യങ്ങളിൽ കണ്ടെത്തിയിട്ടുണ്ട്. B.1.617-​ന്റെ മൂന്ന്​ വകഭേദങ്ങൾ ഇന്ത്യയിൽ കണ്ടുവരുന്നുണ്ട്​. രാജ്യത്ത്​ കോവിഡ്​ ഏറ്റവും ഭീകരമായി പടർന്നുപിടിച്ച മഹാരാഷ്​ട്രയിലെ 50 ശതമാനം രോഗികളിലും ഇതേ വകഭേദമാണ്​ കണ്ടെത്തിയത്.