അഹമ്മദാബാദ്: കൊല്‍ത്തത്ത നൈറ്റ് റൈഡേഴ്‌സിനെതിരെ ഡല്‍ഹി ക്യാപിറ്റല്‍സിന് 7 വിക്കറ്റ് വിജയം. 155 റണ്‍സ് വിജയലക്ഷ്യവുമായി ബാറ്റിംഗിനിറങ്ങിയ ഡല്‍ഹി 21 പന്തുകള്‍ ബാക്കി നിര്‍ത്തിയാണ് ജയിച്ചുകയറിയത്. ഓപ്പണര്‍ പൃഥ്വി ഷായുടെ വെടിക്കെട്ട് ബാറ്റിംഗാണ് ഡല്‍ഹിയുടെ വിജയത്തില്‍ നിര്‍ണായകമായത്.
ഒന്നാം വിക്കറ്റില്‍ 132 റണ്‍സ് കൂട്ടിച്ചേര്‍ത്ത ശേഷമാണ് ശിഖര്‍ ധവാന്‍-പൃഥ്വി ഷാ സഖ്യം വേര്‍ പിരിഞ്ഞത്. ശിവം മാവി തുടക്കമിട്ട ആദ്യ ഓവറില്‍ തന്നെ 25 റണ്‍സാണ് പൃഥ്വി ഷാ നേടിയത്. 6 ബൗണ്ടറികളാണ് ഒന്നാം ഓവറില്‍ പിറന്നത്. തുടക്കം നല്‍കിയ ഊര്‍ജ്ജത്തില്‍ നിന്ന് ഫോമിലേയ്ക്ക് ഉയര്‍ന്ന ഷാ പിന്നീട് കൊല്‍ത്തക്കയുടെ ബൗളര്‍മാരെ തലങ്ങും വിലങ്ങും പായിച്ചു. മറുഭാഗത്ത് പൃഥ്വിയ്ക്ക് പിന്തുണ നല്‍കുക എന്ന റോള്‍ ധവാന്‍(46) ഗംഭീരമാക്കിയതോടെ മത്സരം ഡല്‍ഹിയുടെ വരുതിയിലായി.
41 പന്തില്‍ 11 ബൗണ്ടറികളും 3 സിക്‌സറുകളും പറത്തിയ പൃഥ്വി ഷാ 82 റണ്‍സ് നേടി. ഋഷഭ് പന്ത് 8 പന്തില്‍ 16 റണ്‍സ് എടുത്തു. കൊല്‍ക്കത്തയ്ക്ക് വേണ്ടി പാറ്റ് കമ്മിന്‍സാണ് 3 വിക്കറ്റുകളും സ്വന്തമാക്കിയത്. ജയത്തോടെ 6 മത്സരങ്ങളില്‍ 4 ജയവുമായി ഡല്‍ഹി പോയിന്റ് പട്ടികയില്‍ മൂന്നാം സ്ഥാനത്ത് എത്തി. 6 മത്സരങ്ങളില്‍ 2 എണ്ണത്തില്‍ മാത്രം വിജയിച്ച കൊല്‍ക്കത്ത അഞ്ചാം സ്ഥാനത്താണ്.
Post Your Comments