നിയന്ത്രണംവിട്ട കാർ മരത്തിലിടിച്ച് അപകടം; ഒരാൾക്ക് പരിക്ക്

കറുകച്ചാൽ; നിയന്ത്രണംവിട്ട കാർ റോഡരികിൽ മുറിച്ചിട്ട മരത്തടിയിൽ ഇടിച്ചു കയറി കാർ യാത്രക്കാരന് അപകടത്തിൽ പരിക്കേറ്റു. വെള്ളൂർ സ്വദേശി നെഫിൻ എൽദോ വർഗീസിനാണ് (30) അപകടത്തിൽ പരിക്കേറ്റത്. ഇന്നലെ വൈകിട്ട് 4.30ന് മാന്തുരുത്തി – പാമ്പാടി റോഡിൽ മാന്തുരുത്തിക്കു സമീപമായിരുന്നു അപകടം ഉണ്ടായിരിക്കുന്നത്. കറുകച്ചാലിൽ നിന്നു പാമ്പാടിയിലേക്ക് പോയ നെഫിൻ‍ സഞ്ചരിച്ച കാർ നിയന്ത്രണം വിട്ട് റോഡരികിൽ വെട്ടിയിട്ട മരത്തടിയിൽ ഇടിക്കുകയായിരുന്നു ഉണ്ടായത്. ഇടിയുടെ ആഘാതത്തിൽ കാറിന്റെ മുൻവശം ഭാഗികമായി തകർന്നു.

വാഹനത്തിന്റെ തകിടിന് ഇടയിൽ ഞെരിഞ്ഞമർന്നാണ് നെഫിന്റെ കാലിനു പരിക്കേറ്റത്. കാറിനുള്ളിൽ കുടുങ്ങിയ ഇയാളെ പിന്നാലെ എത്തിയ യാത്രക്കാരാണ് പുറത്തെടുത്തത്. നെഫിനെ കോട്ടയത്തെ സ്വകാര്യ ആശുപത്രിയിൽ പ്രവേശിപ്പിച്ചു. അപകടത്തെ തുടർന്ന് 20 മിനിറ്റോളം ഗതാഗതം മുടങ്ങി. പാമ്പാടി പൊലീസ് എത്തി വാഹനം റോഡിൽ നിന്നു നീക്കിയ ശേഷമാണ് ഗതാഗതം പുനഃസ്ഥാപിച്ചത്.