ശബരിമല സമര നായകനെതിരെ മത്സരിക്കാനില്ല, ഇനി ബി.ജെ.പിക്കൊപ്പം; മഞ്ചേശ്വരത്ത് കെ.സുരേന്ദ്രന്റെ അപരൻ പത്രിക പിൻവലിച്ചു

മഞ്ചേശ്വരത്ത് ബി.എസ്.പി സ്ഥാനാർത്ഥി പത്രിക പിൻവലിച്ചു. കെ.സുരേന്ദ്രന്റെ അപരൻ കെ.സുന്ദരയാണ് പത്രിക പിൻവലിച്ചത്. 2016ൽ കെ.സുരേന്ദ്രനെതിരെ അപരനായി മത്സരിച്ച കെ.സുന്ദര 467 വോട്ടുകൾ നേടിയിരുന്നു. ഇത് കെ. സുരേന്ദ്രന്റെ പരാജയത്തിൽ നിർണ്ണായകമായി. വെറും 89 വോട്ടുകളുടെ ഭൂരിപക്ഷത്തിലാണ് കെ. സുരേന്ദ്രൻ മുസ്ലീം ലീഗിന്റെ പി.ബി അബ്ദുൾ റസാഖിനോട് പരാജയപ്പെട്ടത്.

ഇനി ബി.ജെ.പിക്കൊപ്പം ചേർന്ന് പ്രവർത്തിക്കുമെന്നും ശബരിമല സമര നായകനായ സുരേന്ദ്രനെതിരെ ഇനി മത്സരിക്കില്ലെന്നും പത്രിക പിൻവലിച്ച ശേഷം കെ.സുന്ദര വ്യക്തമാക്കി. 2016 ൽ കെ.സുന്ദരയ്ക്ക് ലഭിച്ച 467 വോട്ടുകളാണ് സുരേന്ദ്രനെ പരാജയപ്പെടുത്തിയതെന്നായിരുന്നു ബിജെപിയുടെ വിലയിരുത്തൽ.

പേരിലെ സാമ്യത പോലും അനുകൂലമായി വന്നതോടെയാണ് ഐസ്‌ക്രീം ചിഹ്നത്തിൽ മത്സരിച്ച കെ.സുന്ദര 467 വോട്ടുകൾ നേടിയത്.