അയ്യപ്പസ്വാമിക്ക് തങ്കഅങ്കി ചാർത്തി ദീപാരാധന; മണ്ഡലപൂജ ശനിയാഴ്ച

ശബരിമല : മണ്ഡലപൂജയ്ക്കു മുന്നോടിയായി തങ്കഅങ്കി ചാർത്തി അയ്യപ്പസ്വാമിക്ക് മഹാദീപാരാധന നടന്നു. 22 ന് ആറന്‍മുളയില്‍ നിന്ന് പുറപ്പെട്ട തങ്ക അങ്കി ഘോഷയാത്ര അഞ്ചരയോടെയാണ് ശരംകുത്തിയില്‍ എത്തിയത്. തുടര്‍ന്ന് ദേവസ്വം അധികൃതര്‍ സ്വീകരിച്ച് വാദ്യമേളങ്ങളുടെ അകമ്പടിയില്‍ സന്നിധാനത്തേക്ക് ആനയിച്ചു.

പതിനെട്ടാം പടി കയറി കൊടിമരച്ചുവട്ടില്‍ എത്തിയതോടെ ദേവസ്വം ബോര്‍ഡ് പ്രസിഡന്റ് ഉള്‍പ്പെടെയുളളവര്‍ ചേര്‍ന്ന് ഘോഷയാത്രയെ വരവേറ്റു. സോപാനത്തില്‍ തന്ത്രിയും മേല്‍ശാന്തിയും ചേര്‍ന്ന് പേടകം ഏറ്റുവാങ്ങി.തുടർന്നായിരുന്നു മഹാദീപാരാധന നടന്നത്.

നാളെ 11.40 നും 12.20 നും ഇടയില്‍ മണ്ഡലപൂജ നടക്കും. വൈകിട്ട് 8.50 ന് ഹരിവരാസനം പാടി നടയടയ്ക്കും. മകരവിളക്ക് ഉത്സവത്തിനായി 30 ന് വൈകിട്ടാണ് വീണ്ടും നട തുറക്കുക. ഡിസംബര്‍ 30 മുതല്‍ ജനുവരി 20 വരെയാണ് മകരവിളക്ക് ഉത്സവത്തിനായി നട തുറക്കുക.