കൊട്ടിയം : കണ്ണനല്ലൂര്‍ പോലീസ് ഔട്ട് പോസ്റ്റ് കെട്ടിടവും കാറും കല്ലെറിഞ്ഞ് തകര്‍ത്ത യുവാക്കള്‍ പോലീസ് പിടിയിൽ. കണ്ണനല്ലൂര്‍, ചരുവിളവീട്ടില്‍ അജിത്ത് (22), ജനാര്‍ദനസദനത്തില്‍ വിക്രമന്റെ മകന്‍ വിഷ്ണു (22) എന്നിവരെയാണ് പോലീസ് അറസ്റ്റ് ചെയ്തിരിക്കുന്നത്.
വെള്ളിയാഴ്ച അര്‍ധരാത്രിയാണ് കണ്ണനല്ലൂര്‍ ഔട്ട്പോസ്റ്റ് കെട്ടിടത്തിലേക്ക് കല്ലേറുണ്ടായത്‌. കല്ലേറില്‍ കെട്ടിടത്തിന്റെ ജനലും പോര്‍ച്ചില്‍ നിര്‍ത്തിയിട്ടിരുന്ന കണ്ണനല്ലൂര്‍ സബ് ഇന്‍സ്പെക്ടറുടെ കാറിന്റെ ചില്ലുകളും തകർന്നു പോയിരുന്നു. കാര്‍ പാര്‍ക്ക് ചെയ്തശേഷം സബ് ഇന്‍സ്പെക്ടര്‍ പുറത്തുപോയ സമയത്തായിരുന്നു പ്രതികള്‍ ആക്രമണം നടത്തുകയുണ്ടായത്. കഴിഞ്ഞദിവസം പ്രതികള്‍ സഞ്ചരിച്ചിരുന്ന കാര്‍ അപകടകരമായ രീതിയില്‍ ഓടിച്ചതിനെത്തുടര്‍ന്ന് കസ്റ്റഡിയിലെടുത്ത്‌ കോടതിയില്‍ ഹാജരാക്കിയിരുന്നു. ഇതിലുള്ള വൈരാഗ്യമാണ് കുറ്റകൃത്യത്തിനു പ്രേരിപ്പിച്ചതെന്ന് പോലീസ് പറയുന്നു . പ്രതികള്‍ക്കെതിരേ അതിക്രമിച്ചുകടക്കല്‍, പൊതുമുതല്‍ നശിപ്പിക്കല്‍ തുടങ്ങിയ കുറ്റം ചുമത്തി കേസ് രജിസ്റ്റര്‍ ചെയ്തു.
Post Your Comments