താജ് മഹല്‍ ഇന്ന് മുതൽ സന്ദര്‍ശകര്‍ക്കായി തുറക്കും

ലഖ്‌നൗ: നീണ്ട ആറ് മാസക്കാലത്തിന്​ ശേഷം ലോക മഹാത്ഭുതങ്ങളിലൊന്നായ താജ്മഹല്‍ സന്ദര്‍ശകര്‍ക്കായി ഇന്ന് തുറന്നു കൊടുക്കും. എന്നാൽ, ഒരുപാട്​ നിയന്ത്രണങ്ങളോടെയാണ്​ താജ്​മഹൽ തുറക്കാൻ പോകുന്നത്​. ദിവസം 5000 പേരെ മാത്രമായിരിക്കും താജിൽ പ്രവേശിക്കാൻ അനുവദിക്കുക.പ്രവേശന ടിക്കറ്റുകൾ ഓൺലൈനിൽ മാത്രമേ വാങ്ങാൻ കഴിയൂ.

Read also: ശ്രീനാരായണ ഗുരു; ഇന്ത്യൻ മതേതരത്വത്തിന്റെ പ്രവാചകൻ

ആഗ്ര കോട്ടയും പൊതുജനങ്ങള്‍ക്കായി ഇന്ന് മുതൽ വീണ്ടും തുറക്കും.2500 സന്ദര്‍ശകരെ മാത്രമേ അനുവദിക്കുകയുള്ളു. അണ്‍ലോക്ക് 4ന്റെ ഭാഗമായാണ് തീരുമാനം. ഫോട്ടോ എടുക്കുന്നതിനും ചില മാനദണ്ഡങ്ങളുണ്ട്​.

ഒരു ഫ്രെയിമിൽ രണ്ടുപേരുണ്ടാകുന്നതിന്​ കുഴപ്പമില്ല. പക്ഷെ, ഇരുവരും തമ്മിൽ ആറടി അകലം പാലിക്കണമെന്നുമാത്രം. വിനോദ സഞ്ചാരികൾക്ക് ഒറ്റയ്​ക്കുള്ള​ ചിത്രങ്ങൾ പകർത്താം. എന്നാൽ, ഒരുമിച്ചുള്ളത്​ പകർത്തണമെങ്കിൽ സാമൂഹിക അകലം പാലിച്ചുകൊണ്ട്​ മാത്രം മതി.

ഇന്ത്യയിലെ ഏറ്റവും പ്രശസ്തമായ ടൂറിസ്റ്റ് സൈറ്റായ താജ് മഹൽ സന്ദർശിക്കാനായി സാധാരണയായി പ്രതിവർഷം ഏഴ് ദശലക്ഷം ടൂറിസ്റ്റുകളാണ് എത്താറുള്ളത്. എന്നാൽ കോവിഡ് രാജ്യത്ത് വ്യാപിച്ചതോടെ കഴിഞ്ഞ  മാർച്ച് മുതൽ അടച്ചിട്ടിരിക്കുകയായിരുന്നു.