സംസ്ഥാനത്ത് വീണ്ടും കോവിഡ് മരണം; മരിച്ചത് വയനാട് സ്വദേശി

മാനന്തവാടി: സംസ്ഥാനത്ത് ഒരു കോവിഡ് മരണം കൂടി. വയനാട് അമ്പലവയൽ സ്വദേശിനിയായ പനങ്ങര വീട്ടിൽ ഖദീജയാണ് കോവിഡ് മരണത്തിന് ഇരയായത്. ഇന്ന് രാവിലെയാണ് മരണം സംഭവിച്ചത്. ചികിത്സയിലിരിക്കവയാണ് ഇവർ മരണത്തിന് കീഴടങ്ങിയത്. ഈ മാസം 14നാണ് ഇവർക്ക് കോവിഡ് 19 സ്ഥിരീകരിച്ചത്.

ഖദീജയ്ക്ക് അനിയന്ത്രിതമായ പ്രമേഹം, കൊവിഡ് അനുബന്ധ ശ്വാസതടസം, ന്യൂമോണിയ എന്നിവയുണ്ടായിരുന്നു. മാനന്തവാടി ജില്ലാ ആശുപത്രിയിൽ തീവ്രപരിചരണ വിഭാഗത്തിലായിരുന്നു ചികിത്സ. അതേസമയം കണ്ണൂരിൽ രണ്ട് പേർ കോ വിഡ് ബാധിച്ച് മരിച്ചു. തളിപ്പറമ്പ് സ്വദേശി സത്യൻ (53), എടക്കാട് സ്വദേശി ഹംസ (75) എന്നിവരാണ് മരിച്ചത്. ഇരുവരും പരിയാരത്തെ കണ്ണൂർ ഗവ. മെഡിക്കൽ കോളജ് ആശുപത്രിയിൽ ചികിത്സയിലായിരുന്നു.

Read Also: കോവിഡ് ഡ്യൂട്ടിക്കിടെ മരിച്ച ഡോക്ടർമാരെക്കുറിച്ച് പരാമർശിച്ചില്ല; ‌ ആരോ​ഗ്യമന്ത്രിയുടെ പ്രസ്താവനയ്ക്കെതിരെ ഇന്ത്യൻ മെഡിക്കൽ അസോസിയേഷൻ

തളിപ്പറമ്പ് കപാലിക്കുളങ്ങര സ്വദേശിയായ സത്യന് ഇക്കഴിഞ്ഞ 16നാണ് കോവിഡ് 19 സ്ഥിരീകരിച്ചത്. 53കാരനായ സത്യൻ പ്രമേഹരോഗിയായിരുന്നു. എടക്കാട് സ്വദേശിയായ ഹംസയ്ക്ക് 75 വയസായിരുന്നു.നാഡീ സംബന്ധമായ അസുഖങ്ങൾക്കും കിഡ്‌നി രോഗങ്ങൾക്കും ചികിത്സ തേടുകയായിരുന്നു. വാർധക്യസഹജമായ മറ്റ് രോഗങ്ങളുമുണ്ടായിരുന്ന ഹംസയെ ഇക്കഴിഞ്ഞ 9 നാണ് കണ്ണൂർ ഗവ. മെഡിക്കൽ കോളജിൽ പ്രവേശിപ്പിച്ചത്.