ഹൈദരാബാദ് : തെലങ്കാനയിലെ മെഡ്ചാല്‍ ജില്ലയില്‍ കൈക്കൂലി വാങ്ങുന്നതിനിടെ റവന്യു ഉദ്യോഗസ്ഥന്‍ പിടിയിലായി. ജില്ലയിലെ കീസാര മേഖലയുടെ ചുമതലയുള്ള മണ്ഡല്‍ ഉദ്യോഗസ്ഥന്‍ എര്‍വ ബാലരാജു നാഗരാജുവാണ് പിടിയിലായത്. തെലങ്കാന അഴിമതി വിരുദ്ധ ബ്യൂറോ (എസിബി)യാണ് ഇയാളെ അറസ്റ്റ് ചെയ്തത്.
കൈക്കൂലിയായി വാങ്ങിയ 1.1 കോടി രൂപയും ഉദ്യോഗസ്ഥര്‍ പിടിച്ചെടുത്തു. എഎസ് റാവു നഗറിലുള്ള വാടക വീട്ടില്‍ വച്ച്‌ കൈക്കൂലി വാങ്ങുന്നതിനിടെയാണ് ഇദ്ദേഹം പിടിയിലായത്. സംഭവവുമായി ബന്ധപ്പെട്ട് ഒരു വില്ലേജ് ഓഫീസറെയും രണ്ട് റിയല്‍ എസ്റ്റേറ്റ് ഏജന്‍റുമാരെയും അറസ്റ്റ് ചെയ്തു. ബാലരാജുവിന്‍റെ വീട്ടിലും തഹസീല്‍ദാരുടെ ഓഫീസിലും ആന്‍റി കറപ്ഷന്‍ ബ്യൂറോ ഉദ്യോസ്ഥരുടെ നേതൃത്വത്തില്‍ തെരച്ചില്‍ തുടരുകയാണ്.
28 ഏക്കര്‍ ഭൂമിയുമായി ബന്ധപ്പെട്ട തര്‍ക്കം പരിഹരിക്കാമെന്ന് പറഞ്ഞാണ് തഹസില്‍ദാര്‍ കൈക്കൂലി വാങ്ങിയത്. 2 കോടി രൂപയാണ് തഹസില്‍ദാര്‍ കൈക്കൂലിയായി ആവശ്യപ്പെട്ടത്.1.1 കോടി രൂപയ്ക്കു പുറമെ 28 ലക്ഷം രൂപയും സ്വര്‍ണവും പണം എണ്ണുന്ന യന്ത്രവും ഇയാളുടെ വീട്ടില്‍ നിന്നും കണ്ടെത്തിയതായി ഉദ്യോഗസ്ഥര്‍ വ്യക്തമാക്കി. വീട്ടില്‍ നിന്നും ഭൂമി രേഖകളും കണ്ടെടുത്തു.
Post Your Comments