യുഎഇയിൽ പ്രവാസികൾ ഉൾപ്പെടെ 7പേർ കൂടി കോവിഡ് ബാധിച്ച് മരിച്ചു, രോഗ ബാധിതരുടെ എണ്ണം 12000 പിന്നിട്ടു

ദുബായ് : യുഎഇയിൽ 7പേർ കൂടി കോവിഡ് ബാധിച്ച് മരിച്ചു. സ്വദേശികളും, പ്രവാസികളുമാണ് മരണപ്പെട്ടതെന്നും രാജ്യത്ത് കോവിഡ് ബാധിച്ച് മരിച്ചവരുടെ എണ്ണം 105ലെത്തിയെന്നും യുഎഇ ആരോഗ്യ പ്രതിരോധ മന്ത്രാലയം വ്യായാഴ്ച്ച അറിയിച്ചു. പുതുതായി 552പേരിൽ രോഗം സ്ഥിരീകരിച്ചു. ഇതോടെ രാജ്യത്തെ രോഗ ബാധിതരുടെ എണ്ണം 12481ലെത്തി. 100പേർ കൂടി സുഖം പ്രാപിച്ചപ്പോൾ, രോഗം ഭേദമായവരുടെ എണ്ണം 2429ആയി ഉയർന്നു. പുതുതായി രോഗം സ്ഥിരീകരിച്ചവരെല്ലാം ചികിത്സയിലാണെന്നും, രാജ്യത്താകെ 27,000 കോവിഡ് -19 ടെസ്റ്റുകൾ കൂടി നടത്തിയതായും ആരോഗ്യമന്ത്രാലയം അറിയിച്ചു. വലിയ തോതിൽ പരിശോധന നടത്തുന്നതുകൊണ്ടാണ് രോഗികളുടെ എണ്ണം കൂടുന്നതെന്നും ദേശീയതലത്തിലും എമിറേറ്റുകളുടെ അടിസ്ഥാനത്തിലും പ്രതിരോധ നടപടികൾ നടന്നുവരുന്നുവെന്നും അധികൃതർ വ്യക്തമാക്കി

ഒമാനിൽ ഒരാൾ കൂടി ഇന്ന് കോവിഡ് ബാധിച്ച് മരിച്ചു. 33 വയസുള്ള ഒമാൻ സ്വദേശിനിയാണ് മരിച്ചതെന്നും, ഇതോടെ ഒമാനിൽ കോവിഡ് മരണസംഖ്യ 11 ആയെന്നും ആരോഗ്യ മന്ത്രാലയം വാർത്തകുറിപ്പിലൂടെ അറിയിച്ചു. 74 പേർക്ക് കൂടി പുതുതായി രോഗം ബാധിച്ചു. ഇതിൽ 35 പേർ വിദേശികളും 39 പേർ ഒമാൻ സ്വദേശികളുമാണ്. ഇതോടെ രാജ്യത്ത് കൊവിഡ് ബാധിച്ചവരുടെ എണ്ണം 2348ലെത്തി. 495 പേർ ഇതിനോടകം രോഗ വിമുക്തി നേടിയെന്നും വാർത്ത കുറിപ്പിൽ വ്യക്തമാക്കുന്നു.

Also read : ചൈനയിലെ കൊറോണ വൈറസ് വ്യാപനം : യുഎസിനെ ബാധിയ്ക്കുമെന്ന് ട്രംപിന് ചാരസംഘടനയായ സിഐഎ മുന്നറിയിപ്പുകള്‍ നല്‍കി : ട്രംപ് അവഗണിച്ചുവെന്ന് റിപ്പോര്‍ട്ട്

ഖത്തറിൽ കോവിഡ് ബാധിതരുടെ എണ്ണം 13000 കടന്നു. കഴിഞ്ഞ 24 മണിക്കൂറിനിടെ 3,085 പേരിൽ നടത്തിയ പരിശോധനയിൽ 845 പേര്‍ക്ക് കൂടി പുതുതായി രോഗം സ്ഥിരീകരിച്ചു. ഇതോടെ രാജ്യത്തെ വൈറസ് ബാധിതരുടെ എണ്ണം 13,409ലെത്തി. രോഗമുക്തരായവരുടെ എണ്ണം 1,372 ആയി ഉയർന്നു 12,027 പേരാണ് നിലവിൽ ചികിത്സയിലുള്ളത്.  രാജ്യത്ത് ആകെ പത്ത് പേരാണ് കോവിഡ് ബാധിച്ച് മരണമടഞ്ഞതെന്നും 94,500 പേർ ഇതുവരെ കോവിഡ് പരിശോധനക്ക് വിധേയമായതെന്നും പൊതുജനാരോഗ്യ മന്ത്രാലയം അറിയിച്ചു.