267 ദശലക്ഷം ഫേസ്​ബുക്ക്​ ഉപഭോക്​താക്കളുടെ ഡാറ്റ ഡാര്‍ക്ക് വെബില്‍ വിറ്റു

ന്യൂയോര്‍ക്ക് • ഫേസ്ബുക്കിനെ വീണ്ടും കുഴപ്പത്തിലാക്കി ഡാറ്റാ ചോര്‍ച്ച ആരോപണം. 267 ദശലക്ഷത്തിലധികം ഫേസ്ബുക്ക് ഉപയോക്താക്കളുടെ സ്വകാര്യ ഡാറ്റ ഡാർക്ക് വെബിൽ വില്‍ക്കപ്പെട്ടതായാണ് ആരോപണം.

സൈബിളിനെയും സുരക്ഷാ ഗവേഷകനായ ബോബ് ഡിയാചെങ്കോയുടെ കണ്ടെത്തലുകളെ അടിസ്ഥാനമാക്കി സൈബർ സുരക്ഷാ സ്ഥാപനമായ സോഫോസ് പുറത്തുവിട്ട റിപ്പോർട്ട് അനുസരിച്ച് 267 ദശലക്ഷം ഫേസ്ബുക്ക് ഉപയോക്തൃ പ്രൊഫൈലുകൾ അടങ്ങിയ ഒരു ഡാറ്റാബേസ് ഡാർക്ക് വെബിൽ 500 ഡോളറിന് അല്ലെങ്കിൽ 540 യുഎസ് ഡോളറിന് (ഏകദേശം 41,033 രൂപ) വിറ്റു. ഒരു റെക്കോർഡിന് ഏകദേശം 0.0002 സെൻറ്. ഈ ഡാറ്റാ ബേസിൽ ഫേസ്ബുക്ക് ഉപയോക്താക്കളുടെ ഐഡികള്‍, പൂർണ്ണ പേരുകൾ, ഇമെയിൽ വിലാസങ്ങൾ, ഫോൺ നമ്പറുകൾ, അവസാന കണക്ഷന്റെ ടൈംസ്റ്റാമ്പുകൾ, റിലേഷന്‍ഷിപ്‌ സ്റ്റാറ്റസ്, പ്രായം എന്നിവ കൂടാതെ അടങ്ങിയിരിക്കുന്നു. എന്നാല്‍, ലംഘനത്തിൽ പാസ്‌വേഡുകളൊന്നും ചോര്‍ന്നിട്ടില്ല.

300 ദശലക്ഷത്തിലധികം ഫേസ്ബുക്ക് ഉപയോക്താക്കളുടെ ഡാറ്റ എങ്ങനെയാണ് ചോർന്നതെന്ന് അറിയില്ലെന്ന് ഒരു ബ്ലോഗ് പോസ്റ്റില്‍ സൈബിൾ പറഞ്ഞു. ഫേസ്ബുക്കിന്റെ തേഡ് പാര്‍ട്ടി എ.പി.ഐയിലെ ചോര്‍ച്ചയോ സ്ക്രാപ്പിംഗോ കാരണം ഇത് സംഭവിച്ചിരിക്കാമെന്ന് സംശയിക്കുന്നു. ഫിഷിംഗ് ആക്രമണത്തിനായി സൈബർ കുറ്റവാളികൾക്ക് ഈ ഡാറ്റ ഉപയോഗിക്കാമെന്നതിനാൽ ഉപയോക്താക്കൾക്ക് അവരുടെ ഫേസ്ബുക്ക് അക്കൗണ്ടുകളിൽ സുരക്ഷ കർശനമാക്കണമെന്നും കമ്പനി മുന്നറിയിപ്പ് നൽകുന്നു.

സൈബർ കുറ്റവാളികളിൽ നിന്ന് അക്കൗണ്ടുകൾ പരിരക്ഷിക്കുന്നതിന് ഫേസ്ബുക്ക് ഉപയോക്താക്കൾ അവരുടെ അക്കൗണ്ടുകളിൽ ടു-ഫാക്ടര്‍ ഓതന്റിക്കേഷന്‍ എനേബിള്‍ ചെയ്യണമെന്നും ഐടി സുരക്ഷാ സ്ഥാപനം ശുപാർശ ചെയ്യുന്നു.