രാഷ്‌ട്രപതി ഭവന്‍ തൊഴിലാളിയുടെ ബന്ധുവിന് കോവിഡ് 19

ന്യൂഡല്‍ഹി • രാഷ്ട്രപതി ഭവനിലെ ഒരു ശുചിത്വ തൊഴിലാളിയുടെ ബന്ധുവിന് കൊറോണ വൈറസ് പോസിറ്റീവ് സ്ഥിരീകരിച്ചു. എന്നാല്‍ ഇയാളുടെ മറ്റു കുടുംബാംഗങ്ങള്‍ക്ക് പരിശോധനയില്‍ നെഗറ്റീവ് ഫലമാണ്‌ ലഭിച്ചത്. കൊറോണ വൈറസിന് പോസിറ്റീവായ വക്തി രാഷ്ട്രപതി ഭവനിലെ ജോലിക്കാരിയല്ല. പക്ഷേ, അവര്‍ രാഷ്‌ട്രപതി ഭവന്റെ വിശാലമായ സമുച്ചയത്തിലാണ് താമസിക്കുന്നത്. ഇതേത്തുടര്‍ന്ന് രാഷ്ട്രപതി ഭവന സമുച്ചയത്തിലെ 125 വീടുകളും ഐസോലേഷനിലാക്കി.

അതേസമയം, ഇന്ത്യയില്‍ സ്ഥിരീകരിച്ച കോവിഡ് 19 അണുബാധകളുടെ എണ്ണം 18000 കടന്നു, 590 പേർക്ക് ജീവൻ നഷ്ടപ്പെട്ടു.ആരോഗ്യ മന്ത്രാലയത്തിന്റെ കണക്കുകൾ പ്രകാരം, 24 മണിക്കൂറിനുള്ളിൽ 945 പുതിയ കൊറോണ വൈറസ് കേസുകൾ റിപ്പോർട്ട് ചെയ്യപ്പെട്ടു, ഇതോടെ ഇത് ഇന്ത്യയിലെ ആകെ കേസുകളുടെ എണ്ണം 18,601 ആയി.

14,759 സജീവ കേസുകളാണ് ഉള്ളത്. 3,251 പേർ സുഖം പ്രാപിക്കുകയോ ഡിസ്ചാർജ് ചെയ്യുകയോ ചെയ്തു. കേന്ദ്ര ആരോഗ്യ മന്ത്രാലയത്തിന്റെ കണക്കിൽ 77 വിദേശ പൗരന്മാരും ഉൾപ്പെടുന്നു.

ഇന്ത്യയിൽ ഏറ്റവും കൂടുതൽ സ്ഥിരീകരിച്ച കേസുകൾ മഹാരാഷ്ട്ര (4,666) യിലാണ്, തൊട്ടുപിന്നിൽ ഡല്‍ഹി (2,081), ഗുജറാത്ത് (1,939), മധ്യപ്രദേശ് (1,485), തമിഴ്‌നാട് (1,520) എന്നിവയാണ്.

ലോകമെമ്പാടുമുള്ള കൊറോണ വൈറസ് കേസുകളുടെ എണ്ണം ചൊവ്വാഴ്ച രാവിലെ 7 മണി വരെ 24.7 ലക്ഷത്തിലധികമാണ്. ജോൺസ് ഹോപ്കിൻസ് സർവകലാശാലയുടെ കൊറോണ വൈറസ് റിസോഴ്‌സ് സെന്റർ പുറത്തുവിട്ട കണക്കുകൾ പ്രകാരം ഏകദേശം 24,73,209 പേർക്ക് കോവിഡ് -19 പോസിറ്റീവ് സ്ഥിരീകരിക്കുകയും 1,70,042 പേര്‍ക്ക് ജീവന്‍ നഷ്ടമാകുകയും ചെയ്തിട്ടുണ്ട്.